भलिबलको फ्रेन्चाईज १० वर्षका लागि चौधरी समूहलाई !

काठमाडौं । राष्ट्रिय खेल भलिबलको फ्रेन्चाइज प्रतियोगिता आयोजनाको अधिकार १० वर्षका लागि चौधरी समूहलाई दिने तयारी गरिएको छ ।

नेपाल भलिबल संघले महिला र पुरुष भलिबलको फ्रेन्चाईज प्रतियोगिताको अधिकार चौधरी ग्रुपलाई १० वर्षका लागि दिने तयारी गरेको हो ।

निर्वाण चौधरी नेतृत्वको नेपाल स्पोर्ट्स म्यानेजमेन्टर एण्ड इभेन्ट कम्पनीले भलिबलको फ्रेन्चाइज प्रतियोगिता आयोजनाको अधिकार सहित नेपाल भलिबल संघसँग मंगलबार सम्झौता पत्रमा हस्ताक्षर गर्दैछ ।

सम्झौता अनुसार चौधरी नेतृत्वको कम्पनीले महिला र पुरुषको फ्रेन्चाइज भलिबल प्रतियोगिता आयोजनाको सम्पूर्ण अधिकार प्राप्त गर्नेछ । जसको सम्झौता अवधि १० वर्षको राख्ने तयारी छ ।

चौधरी नेतृत्वको स्पोर्ट्स म्यानेजमेन्ट कम्पनीले यस वर्षको सुरुवातमा फुटबलको फ्रेन्चाईज नेपाल सुपर लिग (एनएसएल) सञ्चालन गरेको थियो । कम्पनीले भलिबललाई समेत फुटबलको नेपाल सुपर लिग जस्तै गरेर सञ्चालनको तयारी गरेको हो ।

एनएसएलको समापन समारोहमा भलिबलको फ्रेन्चाईजको घोषणा गर्ने तयारी थियो । तर कोभिडको कारण तत्कालिन समयमा भलिबलको फ्रेन्चाईजको घोषणा हुन सकेको थिएन ।

पछिल्लो समय खेलकुदमा आक्रमक तरिकाले अघि बढ्ने तयारी गरेको चौधरी समूहले फुटबल, भलिबलसंगै क्रिकेटको फ्रेन्चाईज प्रतियोगिता सञ्चालनको तयारीमा छ । 

यसअघि खेलकुदका प्रतियोगितामा प्रायोजन गरेर उपस्थिती जनाउदै आएको चौधरी समूहले पछिल्लो समय आफै ठुला खेलकुद स्पर्धा आयोजनामा अघि सरेको छ ।