पथरीशनिश्चरे खेलकुद महोत्सब हुने 

अर्जुन काफ्ले 

पथरी । मोरङ्गको पथरीशनिश्चरेमा माघ ६ देखी १५ सम्म पथरीशनिश्चरे खेलकुद महोत्सब हुने भएको छ ।

बिहीबार नगरपालिकामा पत्रकार सम्मेलन गरेर महोत्सबको सबै तयारी सम्पन्न गरेको आयोजक नगर खेलकुद विकास समितीले जनाएको छ ।

दश दिनसम्म सन्चालन हुने खेलकुद महोत्सबमा महिला र पुरुष फुटबल, भलिबल, क्रिकेट, बुद्धिचाल, मिनी म्याराथन, कराँते र तेक्वान्दो प्रतियोगीता हुने खेलकुद बिकास समितीका संयोजक दिपक राईले जानकारी दिए । 

माघ ६ गते प्रस्तावित पथरी रंगशालामा महोत्सबको उदघाटन हुने छ भने पथरीशनिश्चरे नगरका विभिन्न मैदानमा खेलका इभेन्ट हुनेछन् । महोत्सबमा नगर भित्रका १ हजार भन्दा बढि खेलाडीले प्रतिस्पर्धा गर्ने भएका छन् ।

पुरुष फुटबलको विजेता टोलीले १ लाख र ट्रफी जित्दा उपविजेताले ५० हजार रुपैयाँ र ट्रफी प्राप्त गर्नेछन् । महिला फुटबलको विजेताले भने १० हजार रुपयाँ र ट्रफी प्राप्त गर्नेछन् । फुटबलमा नगरभित्रका १० टिमले दर्ता गराएका छन् । 

क्रिकेटको विजेताले २० हजार र उपविजेताले १५ हजार रुपयाँ साथै ट्रफी प्राप्त गर्ने छन्, भलिबल खेलको विजेताले २५ हजार र उपविजेताले १५ हजार रुपयाँ प्राप्त गर्ने छन् । फुटबल, क्रिकेट र भलिबलमा विधागत रुपमा समेत खेलाडीलाई पुरस्कृत गरिने नगर खेलकुद विकास समितीका सदस्य सचिव नविन खुलालले जानकारी दिए ।  

तेक्वान्दो र कराँतेमा विभिन्न तौल समुह अन्तरगत प्रतिस्पर्धा गराईनेछ । बुद्धिचालमा समेत विभिन्न विधामा प्रतिस्पर्धा गराईने र मिनी म्याराथनमा भने महिला र पुरुष स्पर्धामा विजेता र उपविजेतालाई मात्र पुरस्कृत गरिने आयोजकले जनाएको छ । 

पथरीशनिश्चरे प्रस्तावित रंगशालामा फुटबल, भलिबल र कराँतेका प्रतिस्पर्धा हुनेछन् भने जिरीखीम्ती मैदानमा क्रिकेटका खेल हुनेछन् । वुद्धिचाल भने सिन भिलेज पार्टी प्यालेसमा हुनेछ । 

क्रिकेटमा वडाभरीका ९ टोलीले प्रतिस्पर्धा गर्दा भलिबलमा ७ टोली भिडने भएका हुन् । महोत्सब सम्पन्न गर्न करिब १४ लाख ३१ हजार रुपैयाँ खर्च हुने आयोजकले जनाएको छ ।