अम्पायरलाई कुट्ने चेतावनी दिने करणलाई एक खेलमा प्रतिबन्ध

काठमाडौं। सामाजिक सञ्जालमार्फत अम्पायरलाई कुनै खेलाडीले पिट्यो भने कति खेलमा प्रतिबन्ध लाग्छ? भनेर प्रश्न गरेका नेपाली राष्ट्रिय टोलीका पेसर करण केसीलाई एक खेलको प्रतिबन्ध लगाइएको छ।

नेपाल पुलिस क्लबबाट प्रधानमन्त्री कप एकदिवसीय क्रिकेट प्रतियोगिता खेलिरहेका करणले एक पेजमा अम्पायरको निर्णयसम्बन्धी विवादित पोस्टमा कमेन्ट गर्दै उक्त जिज्ञासा राखेका थिए।

नेपाल क्रिकेट अम्पायर तथा स्कोरर संघले क्त टिप्पणीप्रति गम्भीर ध्यानाकर्षण भएको जनाएपछि नेपाल क्रिकेट संघ (क्यान)ले करणलाई कारबाही गरेको हो। क्यानका अनुसार उनलाई प्रधानमन्त्री कपको एक खेलमा प्रतिबन्ध लगाइएको छ। साथै १०० प्रतिशत म्याच शुल्क जरिबाना गर्ने निर्णय गरिएको छ।

‘नेपाल पुलिस क्लबका खेलाडी करण केसीले अम्पायरहरू प्रति सामाजिक सञ्जालमार्फत व्यक्त गरेको अभिव्यक्तिप्रति नेपाल क्रिकेट संघको गम्भीर ध्यानाकर्षण भएको छ। उक्त अभिव्यक्ति खेल भावना अनुरूप नभएको ठहर गर्दै सम्बन्धित सबै सरोकारवालासँग समन्वय गरी क्रिकेटर करण केसीलाई एक खेलका लागि प्रतिबन्ध लगाउनुका साथै १०० प्रतिशत म्याच शुल्क जरिवाना गर्ने निर्णय गरिएको व्यहोरा जानकारी गराइन्छ,’ क्यानले भनेको छ।

करणले कमेन्ट्मा इफ कुनै खेलाडीले अम्पायरलाई गल्तीले पिट्यो भने आई मिन् बाइ मिस्टेक...कति म्याच ब्यान्ड हो? जस्ट फर क्वुरी? लेखेका थिए। उनको उक्त कमेन्ट्मा आलोचना आएपछि आफ्नो वालमा अर्को पोस्ट गर्दै उनले माफी मागिसकेका छन्।

उनले यो मजाकका रूपमा लिएको एउटा जिज्ञासा मात्र रहेको बताइसकेका छन्। ‘क्रिकेटमा अम्पायर, कोच र खेलाडी सबै एउटै परिवारजस्तो हुने भएकोले उक्त मजाक गरेर लेखिएको अभिव्यक्तिले कसैलाई ठेस पुगेको भए क्षमायाचना गर्दछु,’ उनले माफी माग्दै भनेका छन्।