तीन वर्षपछि नेयमारको ह्याट्रिक

काठमडौं। टिम रेलिगेसनको डरले कापिरहेको बेला नेयमार भने इन्जुरीको जोखिम लिएर बाहिर बसिरहन मिल्छ?

यसको उत्तर हो मिल्दैन। त्यसैले उनले जोखिम लिएरै बाल्यकालको प्रिय टिमलाई बचाउन जोखिम मोले। घाइते घुँडासँगै पनि नेयमार कति खतरनाक हुन सक्छन् भन्ने कुरा विश्वले फेरि देखाए र ब्राजिलियन सिरी ‘ए’मा ह्याट्रिक गर्दै मैदान तताए। करिब तीन वर्षपछि उनले ह्याट्रिकको स्वाद चाखेका हुन्।

नेयमारको ह्याट्रिकमा सान्तोसले ठूलो जित हात पारेको छ। बिहीबार अल्फ्रेडो जाकोनि स्टेडियममा नेयमारको ह्याट्रिकको भरमा सान्तोसले जुभेन्तुडलाई ३–० ले पराजित गर्‍यो। ब्राजिलको जर्सीमा सर्वाधिक गोलकर्ता रहेका यी स्टारले जम्मा १७ मिनेटको अन्तरमा तीन गोल गरेका हुन्।

यो जितसँगै सान्तोस रेलिगेसन क्षेत्रबाट बाहिर आएको छ। ३७ खेलपछि ११ जित र ११ बराबरीसहित ४४ अंक बटुलेको सान्तोस तालिकाको १४औं स्थानमा छ। अन्तिम खेलमा हार टार्न सके ब्राजिलको शीर्ष लिगमा रहनेछ।

गत हप्तामा क्लबले ३३ वर्षका नेयमारले बाँया घुँडाको मेनिस्कस समस्या ठीक गर्न आर्थ्रोस्कोपिक शल्यक्रिया गराउनुपर्ने जनाएको थियो। तर, उनले पीडा कम गर्न उपचार लिँदै सान्तोसका अन्तिम दुई खेल खेलेका छन्।

नेयमारले २०२२ को अप्रिलपछि पहिलो ह्याट्रिक गरेका हुन्। उनले पेरिस सेन्ट–जर्मेन (पीएसजी) का लागि क्लेरमोन्टविरुद्ध ह्याट्रिक गरेका थिए। जुभेन्तुडविरुद्ध खेलको ५६औं मिनेटमा काउण्टर–अट्याकबाट पहिलो गोल गरे। त्यसपछि १० मिनेटभित्रै इगोर भिनिसियसको क्रसबाट दोस्रो गोल जोडे।

त्यसपछि पेनाल्टीमार्फत ह्याट्रिक पूरा गरे। ८३औं मिनेटमा उनलाई मैदानबाट बाहिर निकालियो। अन्तिम दुई खेलमा उनले ४ गोल गरेका छन्। साथै, यस सिजनका १८ खेलमा ८ गोल र १ असिस्ट गरेका छन्।

आउँदो आइतबार सान्तोसले लिग सिजनको अन्तिम खेल क्रुसेइरोविरुद्ध खेल्नेछ।