आर्सनलमाथि भिल्लाको नाटकीय जित

काठमाडौं। एस्टन भिल्लाको नाटकीय जितसँगै प्रिमियर लिग उपाधि अभियानमा रहेको आर्सनलले शनिबार ठूलो धक्का खेप्न पुगेको छ।

इन्जुरी समयमा एमिलियानो बुन्डियाले गरेको निर्णायक गोलले भिल्लालाई २–१ को जित दिलायो।

यस जितसँगै भिल्लाले तालिकाको शीर्ष स्थानमा रहेको आर्सनलसँगको दूरी ३ अंकमा झारेको छ। म्यानचेस्टर सिटीलाई समेत मिकेल आर्टेटाको टोलीसँग नजिकिन मौका दिएको छ।

भिल्ला पार्कमा थपिएको पाँचौं मिनेटमा बुन्डियाले गरेको शक्तिशाली प्रहार आर्सनलका गोलरक्षक डेभिड रायालाई पार गर्दै जाली चुम्यो। लगातार तेस्रो अवे खेलमा आर्सनलले अंक गुमाएको हो। यसअघि सन्डरल्यान्ड र चेल्सीसँग पनि उसले बराबरी खेलेको थियो।

भिल्लाले पछिल्ला १० खेलमध्ये ९ मा जित निकाल्दै उत्कृष्ट फर्म जारी राखेको छ। टोली दोस्रो स्थानमा उक्लिएको छ। ३६औं मिनेटमा म्याटी क्यासले उनाई एमरीको टोलीलाई अग्रता दिलाएका थिए। तर, खेलको ५२औं मिनेटमा लेन्ड्रो ट्रोसार्डले बराबरी गोल फर्काए।

८७औं मिनेटमा मैदान प्रवेश गरेका बुन्डिया प्रशिक्षक एमरीका लागि निर्णायक ‘सुपर सब’ बने। रायालाई पार गर्दै गरेको उनको प्रहारले आर्सनललाई स्तब्ध बनायो।