कुशलको अलराउन्ड प्रदर्शनमा आर्मीको शतप्रतिशत जित

काठमाडौं। कुशल मल्लको अलराउन्डर प्रदर्शनसँगै त्रिभुवन आर्मी क्लब प्रधानमन्त्री कप एकदिवसीय क्रिकेट प्रतियोगिताको लिग चरणमा अपराजित भएको छ।

आर्मीले लिग चरणको अन्तिम खेलमा लुम्बिनी प्रदेशमाथि एक विकेट जित निकालेको हो। अपराजित रहँदै फाइनल प्रवेश गरिसकेको आर्मीले ९ खेलबाट १७ अंक जोड्यो।

आर्मीले फाइनलमा सुदूरपश्चिम प्रदेशविरुद्ध खेल्ने तय छ। लुम्बिनी भने ९ अंकसहित छटौं स्थानमा रह्यो।

लुम्बिनीले दिएको १३९ रनको लक्ष्य पछ्याएको आर्मीले २५.२ ओभरमा ९ विकेट गुमाउँदै १४१ रन बनायो। आर्मीका कुशलले सर्वाधिक ४१ रन बनाए। ३६ बल खेलेका उनले ७ चौका र एक छक्का प्रहार गरे।

अर्जुन साउद २८, भीमा सार्की १८, इमरान शेख १६ र बसीर अहमद १२ रनमा आउट भए।

लुम्बिनीका सन्तोष यादवले ५ र निर्मल गुरुङले ४ विकेट लिए।

त्यसअघि जनकपुरस्थित रामजानकी बहुउद्देश्यीय रंगशालामा टस जितेर पहिला ब्याटिङ थालेको लुम्बिनीले ३९.२ ओभरमा सबै विकेट गुमाउँदै १३८ रन बनायो।

लुम्बिनीका ओपनर रञ्जित खड्काले सर्वाधिक २८ रन बनाए। ५५ बल खेलेका उनले ५ चौका प्रहार गरे।

कप्तान देव खनाल २३, आकाश त्रिपाठी २१ र प्रज्वल थापा १५ रनमा आउट भए।

आर्मीका कुशल मल्लले सर्वाधिक ४ विकेट लिए। ८ ओभर बलिङ गरेका उनले १ मेडनसहित २६ रन खर्चिए। भीम सार्की र नरेन साउदले समान २ विकेट राखे।