आठौंका फुटबल खेल बिहान र साँझमा हुने

नेपालगञ्ज । आठौँ राष्ट्रिय खेलकुद अन्तर्गत पुरुष फुटबलका खेल बिहान र साँझमा हुने भएका छन् । तराईमा हुने चर्को गर्मीलाई ध्यानमा राख्दै पुरुष फुटबलका खेलहरु बैशाख ४ गतेबाट ११ गतेसम्म दुई सत्रमा सञ्चालन गर्न लागिएको हो ।

अखिल नेपाल फुटबल संघ एन्फाले पुरुष फुटबल खेल बिहान साँढे ७ र बेलुकी ४ बजे पछाडी सञ्चालन गरिने जानकारी दिएको छ ।

पुरुष फुटबलका खेलहरु बुटवल र नेपालगञ्ज रंगशालामा हुनेछ ।

समुह ए मा नेपाल पुलिस, त्रिभुवन आर्मी, प्रदेश नम्बर २, ६ र ७ रहेका छन् । यस्तै समुह बीमा एपीएफ, प्रदेश नम्बर १, ३, ४ र ५ रहेका छन् ।

समुह चरणका खेलहरु सबै बुटवलमा हुनेछ भने सेमिफाइनल र फाइनल खेल नेपालगञ्ज रंगशालामा हुनेछ ।

बैशाख ४ गते हुने उद्घाट्न खेलमा प्रदेश ६ र प्रदेश ७ बीच प्रतिस्पर्धा हुनेछ ।

सोहि दिन बेलुकी ४ बजे त्रिभुवन आर्मी क्लबले प्रदेश नम्बर दुईसंग खेल्नेछ ।

बैशाख ५ गते नेपाल पुलिस र प्रदेश ७ बिहानी समयमा भिड्नेछन् ।

बेलुकी ४ बजे प्रदेश नम्बर ६ र प्रदेश २ भिड्ने छन् ।

बैशाख ६ गते त्रिभुवन आर्मी क्लबले नेपाल पुलिससँग खेल्दा बेलुका प्रदेश ७ र प्रदेश २ बीच प्रतिस्पर्धा हुनेछ ।

बैशाख ७ गते बिहान त्रिभुवन आर्मी क्लब र प्रदेश नम्बर ६ तथा बेलुका प्रदेश नम्बर २ र नेपाल पुलिस क्लबले समुह चरणको खेल खेल्नेछन् ।

समुह चरणको अन्तिम खेलमा ८ गते प्रदेश नम्बर ७ र त्रिभुवन आर्मी तथा नेपाल पुलिस क्लब र प्रदेश नम्बर ६ भिड्ने छन् ।

सेमिफाइनल खेल १० गते रहेको छ । जसमा समुह क को विजेताले समुह ख को उपविजेतासँग विहान साँढे सात बजे नेपालगंज रंगशालामा खेल्नेछ ।

यस्तै समुह ख को विजेता र समुह क को उपविजेताको दोस्रो सेमिफाईनल खेल दिउँसो साँढे ३ बजे हुनेछ ।

यस्तै तेस्रो स्थानको खेल बिहान साँढे ७ बजे हुनेछ ।

फाइनल खेल भने सोही दिन साँढे ३ बजे नेपालगंज रंगशालामा हुनेछ ।