२२ वर्षपछि बंगलादेशले घरेलु मैदानमा भारतलाई हरायो

काठमाडौं। २२ वर्षपछि बंगलादेशको जमिनमा खेलेको भारत पुनः हारको पीडामा डुबेको छ। एएफसी एसियन कप २०२७ छनोटअन्तर्गत मंगलबार भएको समूह ‘सी’ को अन्तिम खेलअघि भारत १–० ले पराजित भएको हो।

नेशनल स्टेडियममा घरेलु टोलीलाई जित दिलाउन ११औं मिनेटमा शेख मोरसालिनले गोल गरे। उनकै एकमात्र गोल निर्णायक बन्यो। २००३ को साफ गोल्डकपमा यही मैदानमा भारत २–१ ले पराजित भएको थियो।

दुई दशकभन्दा बढी समयपछि ढाका फर्किएको भारतीय टोलीले इतिहास पुनः दोहोर्‍याउन नचाहे पनि परिणाम उस्तै रह्यो। पहिले नै छनोटबाट बाहिरिएको भारतका लागि खेल नतिजाका हिसाबले खासै अर्थपूर्ण थिएन। तर, प्रदर्शन सुधार्ने अवसरलाई पनि भारतले सदुपयोग गर्न सकेन।

यस हारसँगै भारत पाँच खेलमा जम्मा दुई अंकसहित समूहको पुछारमै रह्यो। भारतले पाँच खेलमा तीन हार र दुई बराबरीको नतिजा निकालेको छ। उता बंगलादेशले पाँच खेलबाट पाँच अंक बनाउँदै तेस्रो स्थान सुरक्षित राख्यो।

दुवै टोलीबीचको पहिलो लेग मार्च २५ मा शिलङमा गोलरहित बराबरीमा सकिएको थियो। अब भारतले ३१ मार्च २०२६ मा हङकङविरुद्ध घरेलु मैदानमा अन्तिम खेल खेलेर अभियान समाप्त गर्नेछ।