सुधारिएको युनाइटेडको लयमा ब्रेक

काठमाडौं। म्यानचेस्टर युनाइटेडलाई १–० ले हराउँदै एभर्टनले प्रिमियर लिगमा घरेलु टिमको पछिल्लो सुधारिएको लयमा ब्रेक लगाएको छ।

१३औं मिनेटमा आफ्नै टोलीका माइकल कीनलाई हानेको कारण इड्रिस्सा गुएलाई रातो कार्ड देखाइएको घटना नै खेलको सबैभन्दा चर्चा हुने क्षण बन्यो।

२९औं मिनेटमा किर्नान ड्युजबरी-हलले सानदार गोल गर्दै एभर्टनलाई अग्रता दिलाए। त्यसपछि १० खेलाडीमा झरेको एभर्टनले खेलभरि आफ्नो अग्रता जोगाइराख्न बचाउमा ध्यान केन्द्रित गर्‍यो।

‘उनीहरू नै राम्रो टिम थिए, ११ खेलाडीमा होस् वा १० मा,’ युनाइटेडका प्रशिक्षक रुबेन आमोरिमले भने, ‘हामी सुरुदेखि नै पर्याप्त तीव्रताका साथ मैदानमा थिएनौं। उनीहरू १० मा झरेपछि हामीले अझै आक्रामक हुनुपर्थ्यो। ध्यान केन्द्रित हुन आवश्यक थियो। हामीले अझ धेरै गर्नैपर्थ्यो।’

युनाइटेडको करिब दुई महिनापछि यो पहिलो हार हो। अघिल्लो हार ब्रेन्टफोर्डसँग ३–१ को थियो। साथै, ४७ खेलपछि पहिलोपटक ओल्ड ट्राफोर्डमा १० खेलाडीमा समेटिएको टोलीले जित हासिल गरेको दिन पनि यही रह्यो।

तर, खेलको सबैभन्दा यादगार घटना १३औं मिनेटमा भयो। गुए कीनले पास ठिकसँग नलिएपछि असन्तुष्ट बने र विवाद सुरु भयो। ब्रुनो फर्नान्डेजले त्यसपछि शट प्रहार गरे।

तर, गुए कीनसँग रिसाए। कीनले उनलाई धकेल्दा गुएले प्रतिकारस्वरूप कीनको गालामा चड्का हाने। त्यसपछि रेफ्री टोनी ह्यारिङ्टनले हिंसात्मक व्यवहारका कारण रातो कार्ड देखाए।

‘गुएलाई देखाइएको रातो कार्डलाई भीएआरले पनि पुष्टि गर्‍यो। त्यो स्पष्ट रूपमा सहखेलाडीको अनुहारमा प्रहार गरिएको थियो,’ प्रिमियर लिगले सामाजिक सञ्जालमार्फत जानकारी दिएको छ।

यसअघि २००८ मा स्टोक सिटीका रिकार्डो फुलरले आफ्नै सहखेलाडी एन्डी ग्रिफिनसँग झगडा गरेपछि देखाइएको रातो कार्डपछि यस्तो कारणले मैदानबाट निकालिएका थिए। त्यसयता सेनेगलका खेलाडी यसरी रातो कार्ड पाउने पहिलो खेलाडी बने।

ड्युजबरी-हलले यसलाई एक क्षणको पागलपन भन्दै त्यसलाई कम महत्व दिए। ‘यो एकदमै अनावश्यक थियो, तर खेलपछि इड्रिस्साले सबैसँग माफी मागे। यस्तो अवस्थाबाट टिमले जसरी प्रतिक्रिया दियो, त्यो अविश्वसनीय हो,’ उनले भने।