चम्किएका भिटिन्हा

काठमाडौं। मिडफिल्डर भिटिन्हाले सानदार ह्याट्रिक गर्दै पेरिस सेन्ट–जर्मेनलाई (पीएसजी) बुधबार च्याम्पियन्स लिगमा रोमाञ्चक जित दिलाएका छन्। दुईपटक पछि परेको खेललाई उल्टाउँदै उनले टोटनह्यामविरुद्ध ५–३ को जित निकाल्न मद्दत गरेका हुन्।

उनले पहिलो गोल दायाँ खुट्टाले, दोस्रो बायाँ खुट्टाले र तेस्रो पेनाल्टीबाट गरेका हुन्। ‘निश्चय नै विशेष क्षण हो,’ भिटिन्हाले भने, ‘किनकि मैले करिअरमै पहिलो पटक एकै खेलमा दुई गोलभन्दा बढी गरें।’

पीएसजीले स्टार फारवर्डहरूबिना पनि आक्रमणमा राम्रो प्रदर्शन गर्‍यो। बालोन डी’ओर विजेता उस्मान डेम्बेले चोटबाट फर्किएका थिए। तर, बेन्चमा बसे। गत वर्षको च्याम्पियन्स लिग फाइनलमा इन्टरविरुद्ध दुई गोल गरेका डेजिरे दुए अझै फर्किन सकेका छैनन्।

३५औं मिनेटमा काउन्टर अट्याकबाट टोटनह्यामले अग्रता लियो। आर्ची ग्रेले ब्याकपोस्टमा पोल्टिएको क्रस हाने र पीएसजीबाट यस सिजन ऋणमा आएका रान्डल कोलो मुआनीले बल हेडर गर्दै रिचार्लिसनलाई नजिकबाट सहज ट्याप–इन गर्न दिए।

तर, पहिलो हाफ सकिन केही समय बाँकी छँदा टोटनह्यामका डिफेन्डरले भिटिन्हालाई रोक्न सकेन। उनले बक्सको छेउबाट सुन्दर फिनिश गर्दै बल माथिल्लो दायाँ कुनामा राखे।

५३औं मिनेटमा भिटिन्हाले फेरि धेरै स्पेस पाउँदा बक्सभित्रैबाट कर्ल गर्दै दोस्रो गोल गरे। यसअघि मात्र तीन मिनेटअघि कोलो मुआनीले टोटनह्यामलाई २–१ को अग्रता दिलाएका थिए।

त्यसपछि पीएसजीले छोटो अन्तरालमै थप दुई गोल गर्‍यो। फाबियन रुइजले लो सर्ट र विलियन पाचोको कोर्नरपछि नजिकबाट गोल गरे। योसँगै टोटनह्यामको कमजोर डिफेन्स फेरि उजागर भयो।

टोटनह्याम पछिल्ला ६ खेलमध्ये ४ मा पराजित भइसकेको छ। आइतबार मात्र आर्सनलसँग ४–१ ले हारेका थिए।

भिटिन्हाको ह्याट्रिक

मुख्य प्रशिक्षक थोमस फ्राङ्कको टोलीले आक्रामक खेल प्रदर्शन गरिरहेकाले पीएसजीका लागि खेल सजिलो थिएन। ७३औं मिनेटमा भिटिन्हाले दुर्लभ गल्ती गर्दै बल गुमाएपछि कोलो मुआनीले गोल गर्दै खेल ४–३ बनाए।

तर, केही क्षणमै भिटिन्हाले आफ्नो ह्याट्रिक पूरा गरे। क्रिस्टियन रोमेरोले हातले ब्लक गरेको शटका कारण पाइएको पेनाल्टी उनले सदुपयोग गरे। पुरुष बलोन डी’ओरमा तेस्रो स्थानमा रहेका भिटिन्हाले यसअघि १७० खेलमा २१ गोल मात्रै गरेका थिए। त्यसैले यो प्रदर्शन विशेष मानियो।

इन्जुरी टाइमको अन्त्यतिर उनी परिवर्तन हुँदा पार्स दे प्रिन्सको दर्शकदीर्घाले उनलाई उभिएर धन्यवाद दिएका थिए।