खेलाडीको माग अनुसार डिभिजन लिग गर्ने सहमती

काठमाडौं । फुटबल खेलाडीहरुको माग अनुसार यस वर्ष ए डिभिजन लिग गर्ने सहमती बनेको छ ।

शुक्रबार एन्फा हेडक्वार्टरमा भएको कार्यदलल यस वर्ष राष्ट्रिय लिगपछि ए डिभिजन गर्ने सहमती गरेको हो ।

एन्फा र ए डिभिजनका क्लबले पुस ९ गतेदेखि राष्ट्रिय लिग गर्ने सम्झौता गरेका थिए ।

फुटबल खेलाडी संघले विगत तीन वर्षदेखि ए डिभिजन लिग रोकिएको भन्दै डिभिजन फुटबल सहित सबै प्रतियोगिता हुनुपर्ने भन्दै आन्दोलनमा उत्रिएको थियो ।

खेलाडीहरु आन्दोलनमा उत्रिएपछि खेलकुद मन्त्रालयले अग्रसरता लिदै माग सम्बोधनको गृहकार्य गरेको थियो ।

त्यसपछि खेलाडी संघ, एन्फा र क्लबहरुले कार्यदल बनाएर सहमती जुटाउने प्रयास गरेका थिए ।

शुक्रबारको बैठकमा सुरुमा राष्ट्रिय लिग गर्ने र लगत्तै डिभिजन लिग गर्ने सहमती बनेको छ ।

‘पुसको अन्तिम साता राष्ट्रिय लिग सुरु गर्ने र राष्ट्रिय लिग सम्पन्न भएको एक महिनाभित्र ए डिभिजन लिग गर्ने सहमती बनेको छ । सोही सहमती अनुसार एन्फाले कार्यसमिति बैठकबाट निर्णय गरेर तयारी अघि बढाउने विषयमा सबै पक्ष एकमत भएका छौं ।’ बैठकमा सहभागी एक प्रतिनिधिले खेलपाटीसँग भने ।

स्रोतका अनुसार अब राष्ट्रिय लिग पुस २५ देखि सञ्चालन हुनेछ भने ए डिभिजन सहित अन्य प्रतियोगिताको तालिका समेत एन्फाले संशोधन गर्नेछ ।

एन्फाले विगत तीन वर्षदेखि ए डिभिजन लिग गर्न सकेको छैन । एन्फाको विधानमा घरेलु लिगको संरचनाभित्र राष्ट्रिय लिग पनि छ । तर एन्फाले एक वर्षभित्र पुरा गर्नुपर्ने लिगको चक्र पुरा गर्न नसक्दा घरेलु फुटबलको संरचना अस्तव्यस्त छ ।