युनाइटेडको सानदार पुनरागमनसहित जित

काठमाडौं। म्यानचेस्टर युनाइटेडले इङ्लिस प्रिमियर लिगमा सानदार पुनरागमनसहित जित हात पारेको छ।

आइतबार सम्पन्न खेलमा घरेलु टोली क्रिस्टल प्यालेसलाई २–१ ले पराजित गरेको हो। जितसँगै छैटौं स्थानमा उक्लिएको युनाइटेडले १३ खेलबाट २१ अंक पुर्‍याएको छ।

एक स्थान तल झरेको प्यालेसको २० अंक छ। प्यालेसले पहिलो हाफमै अग्रता लिएको थियो। तर, युनाइटेडले दोस्रो हाफमा उत्कृष्ट खेल्दै तीनै अंक सुरक्षित गर्‍यो।

खेलको ३६औं मिनेटमा ज्यान–फिलिप माटेटाले पेनाल्टीमार्फत गोल गर्दै प्यालेसलाई १–० को अग्रता दिलाए। पहिलो हाफभरि युनाइटेडले प्रयास गरे पनि बराबरी गोल निकाल्न सकेन।

दोसो हाफमा भने युनाइटेड थप आक्रामक बन्यो। ५४औं मिनेटमा जोशुवा जिर्कजीले गोल गर्दै खेललाई १–१ को अवस्थामा ल्याए।

त्यसपछि ६३औं मिनेटमा मेसन माउन्टले सुन्दर फिनिसिङ गर्दै युनाइटेडलाई २–१ को अग्रता दिलाए, जुन नै अन्तिम नतिजा बन्यो।