साढे दुई वर्षमै एनरिकले पीएसजीलाई जिताए १०औं उपाधि

काठमाडौं। गत एक वर्ष लिग वान, च्याम्पियन्स लिग, फ्रेन्च कप, युएफा सुपर कप र फिफा इन्टरकन्टिनेन्टल कप जितेको पेरिस सेन्ट–जर्मेन (पीएसजी) ले अर्को उपाधि पनि आफ्नो नाममा लेखाएको छ।

पीएसजीले गएराति फ्रेन्च सुपर कपको फाइनलमा मार्सेईलाई हराएको हो। कुवेतको जाबेर अल–अहमद स्टेडियममा भएको खेलको निर्धारित समय २–२ गोलको बराबरीमा सकिएको थियो। त्यसपछि उपाधि पेनाल्टी सुटआउटमार्फत टुंगिएको थियो।

पेनाल्टी सुटआउटमा मार्सेईले पहिलो दुई प्रहार खेर फाल्दा पीएसजीलाई चार प्रहार मात्र पर्याप्त भयो। पीएसजीका लागि गोन्कालो रामोस, भिटिन्हा, नुनो मेन्डेस र देजिरे दुयेले गोल गर्दै ४–१ को जित सुनिश्चित गरे।

खेलको नवौं मिनेटमै उस्मान डेम्बेलेले मार्सेईका गोलरक्षकको टाउकोमाथिबाट चिप गोल गर्दै पीएसजीलाई अग्रता दिलाएका थिए। पहिलो हाफमा थप गोल हुन सकेन भने दोस्रो हाफको सुरुआती ३० मिनेट पनि गोलरहित रह्यो।

अन्तिम २२ मिनेटमा भने खेल रोचक बन्यो। ७६औं मिनेटमा मार्सेईले पेनाल्टीमार्फत गोल गर्दै खेलमा फर्किने संकेत दिएको थियो। त्यसपछि विलियन पाचोको आत्मघाती गोलले खेल बराबरीमा पुगेको थियो। तर, खेल सकिन दुई मिनेट बाँकी रहँदा गोन्कालो रामोसले निर्णायक गोल गर्दै खेललाई पेनाल्टी सुटआउटतर्फ धकेले।

यस जितसँगै लुइस एनरिकको प्रशिक्षणमा पीएसजीले आफ्नो १०औं उपाधि जितेको छ। सन् २०२३ जुलाईमा जिम्मेवारी सम्हालेका स्पेनी प्रशिक्षक एनरिकको नेतृत्वमा पीएसजीले दुई–दुई लिग र फ्रेन्च कप जितिसकेको छ।

क्लबको बहुप्रतीक्षित च्याम्पियन्स लिग पनि आफ्नो नाममा लेखाएको छ। फ्रेन्च सुपर कप पीएसजीले हालसम्म तीन पटक जितेको छ, जसमा यो लगातार तेस्रो उपाधि हो।