मछिन्द्र सेमिफाइनलमा

नमिन ढकाल, इलाम। गोलरक्षक प्रदीप भण्डारीको उत्कृष्ट प्रर्दशनसँगै मछिन्द्र क्लब तेस्रो इलाम गोल्डकपको सेमिफाइनल प्रवेश गरेको छ।

ठूलो टुँडिखेलमा जारी प्रतियोगिताको तेश्रो क्वाटरफाइनल खेलमा पाहुना टोली एन पेनाङ एफसी मलेसियालाई टाइब्रेकरमा ३–२ ले हराउँदै मछिन्द्रले अन्तिम ४ मा स्थान सुरक्षित गरेको हो।

निर्धारित समयमा दुवै टिमले गोलरहित बराबरी खेलेका थिए। टाइब्रेकरमा मछिन्द्रका गोलरक्षक भण्डारीले मलेसियाको २ वटा प्रहार बचाएका थिए। मलेसियाका कप्तान लहान सुब्बा र निशान लिम्बूको प्रहार भण्डारीले बचाए।

पाउल फेमी र ओलाये डाउडको प्रहार गोलमा परिणत भएको थियो। गोलरक्षक प्रिसोको प्रहार आकाशिएको थियो। मछिन्द्रको तर्फबाट कप्तान देवेन्द्र तामाङ, सनिश श्रेष्ठ र मिलन चाम्लिङले गोल गरे।

दिवाकर चौधरीको प्रहार बाहिरिको थियो भने दिपेश गुरुङको प्रहार गोलरक्षक प्रिसोले बचाएका थिए। आजको खेलमा मछिन्द्रका प्रशिक्षक प्रवेश कट्वालले पहिलो रोजाईका गोलरक्षक विशाल श्रेष्ठलाई विश्राम दिएका थिए।

खेलको ‘म्यान अफ दी म्याच’ विजेता टिमका गोलरक्षक भण्डारी घोषित हुँदै नगद ८ हजार एक सय प्राप्त गरेका थिए। प्रतियोगिताको अन्तिम क्वाटरफाइनल खेलमा अघिल्लो २ संस्करणको विजेता न्यूरोड टिम (एनआरटी) र चित्लाङ एफसी भिड्दैछन्।