गर्मीको चुनौती अनि व्यवस्थापनको सिकार

नेपालगञ्ज । फेन्सिङको खेल चलिरहेको थियो । एक्कासी बत्ति गयो । दिउँसोको समयमा तापक्रम ३८ डिग्रीमाथि चढेको थियो । बत्तिको समस्या आएपछि खेल रोकियो । खेलाडी असिन पसिन भए । कभर्डहल भित्रका खेलाडी सामान्य पंखाका अगाडी बसेर गर्मी छल्ने प्रयास गरे । हावा हप्किन कोही भने कपडा र क्यापको साहारा लिदै थिए ।

उसैपनि फेन्सिङको कपडा बाक्लो हुन्छ । गर्मीमा खेल्न अझै गाह्रो हुन्छ । तर बेला बेलामा बत्तिमा आउने समस्याले खेलाडीलाई थप सास्ती ब्यहोर्नु परेको छ ।

‘समयमानै खेल भएको भए गर्मीमा बसिरहनु पर्दैन थियो । गर्मीको बाबजुद खेल्दा धेरै गाह्रो हुन्छ ।’ आठौं राष्ट्रिय खेलकुदमा फेन्सिङमा पहिलो स्वर्ण जितेका जलेन्द्र शाहीले भने, ‘खेललाई बिचमा रोकर बस्नुपर्दा, बाक्लो कपडा हुन्छ । बस्न निकै कठिन हुन्छ ।’

विभागीय टिम आर्मीमा आबद्व शाहीले भने, ‘खेल्दा निकै बाक्लो कपडा लगाउनु पर्छ, गर्मी निकै बढिसेकेको छ । निकै ‘टाईट’ लुगा लगाएर रोकिएर बस्दा धेरै गाह्रो हुन्छ ।’

‘गर्मीको बावजुद खेल्दा कम्तीमा एसीको व्यवस्था हुन पर्ने हो । त्यो समेत छैन । ईन्डोरमा केही पनि व्यवस्थापन नगरि खेल खेलाईएको छ ।’ उनी थप्छन्, ‘मैले बाहिर गएर समेत खेलेको छु । बाहिरको जस्तो सुविधा नेपालमा नहोला, तर सामान्य पुर्वाधार तयार पार्न सकिन्थ्यो होला ।’

फन्सिङमा स्वर्ण जितेका शाहीले राष्ट्रको प्रतिनिधित्व गर्दै विभिन्न अन्तराष्ट्रिय प्रतियोगितामा सहभागिता जनाईसकेका छन् । उनले सन् २०१८ मा इन्डोनेशियामा भएको एसियन गेममा पनि नेपालको प्रतिनिधित्व गरेका थिए ।

हङकङमा भएको प्रतियोगितामा पनि उनले नेपालको प्रतिनिधित्व गरेका थिए । २०६० सालमा विभागमा जागिर सुरु गरेका बाजुराका शाहीले २०७२ बाट फेन्सिङमा आर्मीको प्रतिनिधित्व गर्दै आइरहेका छन् ।

आठौं राष्ट्रिय खेलकुदको औपचारिक उद्घाटन २०७६ साल बैशाख ५ गते राखिएको छ । तर खेलहरु चैत २७ गतेबाटै सुरु भएका छन् । पहिलो दिनबाट खेलाउन सुरु गरिएको फेन्सिङमा चार प्रदेश र तीन विभागीय टिमका खेलाडीको सहभागिता छ ।

फेन्सिङका खेल बिहानदेखि बेलुकासम्म सञ्चालन हुने गरेको छ । बिहान २४ डिग्रीको तापक्रममा सहभागि हुने खेलाडीले बेलुका ३९ डिग्री सम्मको तापक्रमको सामना गर्नु परिरहेको छ ।

प्रतियोगिता अगाडी राष्ट्रिय खेलकुद परिषद् राखेपका सदस्य सचिव केशवकुमार विष्टले २५ डिग्री भन्दा माथिको तापक्रममा खेल नखेलाउने बताएका थिए ।

तर खेलाडीहरु असिन पसिन हुँदै आठौं राष्ट्रिय खेलकुदमा खेल कौशलको परिक्षा दिन बाध्य छन् । अझ खेलाडीहरु आयोजकको फितलो व्यवस्थापनको सिकार समेत बन्नु परेको छ ।

आठौं राष्ट्रिय खेलकुदमा सहभागि खेलाडीलाई मुख्य चुनौती प्रतिद्वन्दी खेलाडी भन्दा गर्मीले दिईरहेको छ । गर्मीकै कारण स्वभाविक खेल खेल्न निकै गाह्रो परेको खेलाडीको गुनासो छ । गण्डकी प्रदेशबाट भखरै एसइइ परिक्षा सकेर नेपालगञ्ज आएकी दिपिशा गुरुङ समेत गर्मीकै कारण खेल्न निकै गाह्रो भएको बताउँछिन् ।

‘दुई दिन मात्रै भयो नेपालगञ्ज आएको, तर यहाँ निकै गर्मी छ । स्वभाविक खेल खेल्न निकै गाह्रो भएको छ ।’ उनले भनिन् ।

पोखरानै घर भएका दिपेश गुरुङ पनि गर्मीका कारण खेल्न गाह्रो भएको मान्छन् ।

प्रतियोगितामा पहिलो चरणबाटै बाहिरिएका उनी भन्छन्, ‘हारेपछि गर्मीलाई दोष दिन त मिल्दैन । तर गर्मी अत्याधिक भएर खेल्न निकै गाह्रो भएको छ । सोचे अनुसारको खेल देखाउन सकिएन ।’