प्रादेशिक भलिबल रेफ्री कोर्स सम्पन्न

काठमाडौं । ढोरपाटन भलिबल क्लबको आयोजनामा भएको प्रादेशिक भलिबल रेफ्री कोर्स सम्पन्न भएको छ ।

बसपार्कस्थित ढोरपाटनको मैदान र साउथ वेस्टन कलेज बसुन्धरामा आयोजना गरिएको आठ दिने कोर्स आइतबारबाट सकिएको हो ।

कोर्समा विभिन्न जिल्लाका १ सय ७ रेफ्रीहरुको सहभागिता रहेको थियो ।

कोर्सबाट ८ जनाले विशिष्ट श्रेणीमा पास गरेका छन् । अन्य रेफ्रीहरु पनि पास भएका छन् ।

रेफ्री कोर्सको परीक्षा सैद्धान्तिक र व्यवहारिकको आधारमा लिइएको थियो ।

नेपाल भलिबल संघको स्वीकृतिमा सञ्चालन भएको कोर्समा अन्तराष्ट्रिय रेफ्री गौतम लासिबाले प्रशिक्षण दिएका थिए ।

भलिबलको दक्ष जनशक्ति तयार पार्न कोर्सको आयोजना गरिएको आयोजक क्लबले जनाएको छ ।