मनाङको उडान कायम, मछिन्द्रलाई गोलको खडेरी

काठमाडौं । पल्सर सहिद स्मारक 'ए' डिभिजन लिग फुटबलको छैटौं चरणका खेल बिहिबारबाट सकिएको छ । छैटौं चरणको अन्तिम दिन बिहिबार दुई खेल बराबरीमा सकिएको थियो ।

एन्फा कम्प्लेक्स सातदोबाटोमा भएको पहिलो खेलमा उपाधि दाबेदार त्रिभुवन आर्मी क्लबले फ्रेन्ड्स क्लबसंग गोलरहित बराबरी खेल्यो । दोस्रो खेलमा मछिन्द्र क्लब र ब्रिगेड ब्वाइज पनि गोलरहित बराबरीमा रोकिएको थियो ।

सातौं चरणको खेलहरु शनिबारबाट सुरु हुनेछ । हल्चोकस्थित एपीएफ मैदानमा शनिबार हुने पहिलो खेलमा नेपाल पुलिस क्लब र  हिमालयन शेर्पा क्लबले प्रतिस्पर्धा गर्नेछन् । दोस्रो खेलमा संकटा क्लबले न्युरोड टिम एनआरटीको सामना गर्नेछ ।

जारी 'ए' डिभिजन लिगको छैटौं चरणको खेल समाप्तिमा सिग्नेचर मनाङ मर्स्याङ्दी क्लबले शतप्रतिशत जितलाई कायम राखेको छ ।  उपाधि होडलाई बलियो बनाउदै लगेको मनाङले ६ खेलबाट १८ अंक जोडेको छ ।

लिग लिडर मनाङले दोस्रो स्थानको रुस्लान थ्री स्टारलाई ३ अंकले पछि बनाएको छ । एक खेल गुमाएको थ्री स्टारले १५ अंक जोडेको छ । यस्तै १५ अंक जोडेर सिएमजी संकटा तेस्रो स्थानमा छ । जारी लिगमा संकटाले पनि एक खेल गुमाएको छ ।

लिगमा अपराजित रहेको आर्मीले बिहिबार बराबरी खेलेपछि उपाधि होडमा मनाङलाई दबाब दिन सकेन । फ्रेन्ड्ससंगको अप्रत्याशित बराबरीले आर्मीले अंक तालिकामा सुधार गर्न सकेन । फ्रेन्ड्ससंगको बराबरीले आर्मी १४ अंक जोडेर चौथो स्थानमा छ ।

लिगको छैटौं चरणका खेल सकिदासम्म मछिन्द्र क्लबले गोलको खाता खोल्न सकेको छैन् । जारी लिगमा गोल गर्न नसक्ने एक्लो टोली हो मछिन्द्र । छैटौं चरणको खेल सकिदा मछिन्द्रले गोल गर्न नसकेपनि लिगमा १ सय १ गोल पुरा भईसकेको छ ।

लिगको ६ खेल खेलमा मछिन्द्रले तीन खेल गोलरहित बराबरीमा खेलेको छ । तीन खेलमा भने पराजय व्यहोरेको छ । जसमा मछिन्द्रले ७ गोल खाएको छ ।

लिगमा खराब प्रदर्शन गरेपछि मछिन्द्रले मुख्य प्रशिक्षक पनि परिवर्तन गरेको छ । पहिलो तीन खेलमा धनेश्वर प्रजापतिले हेरेको मछिन्द्रलाई अहिले निशान श्रेष्ठले हेरिरहेका छन् ।

प्रशिक्षक निशानले मछिन्द्रको चुनौतीको रुपमा गोल गर्न नसक्नु बताईसकेका छन् । 'हामीले हालसम्म गोल गर्न सकेका छैनौं । हाम्रो मुख्य लक्ष्य गोल गर्नु रहेको छ,' निशानले भने  ।

छैटौं चरणको खेल सकिदा बलिया टोलीले नै जित निकाल्न संघर्ष गर्नु परिरहेको छ । उपाधि दाबेदार मनाङ र थ्री स्टारले जावलाखेल र सरस्वतीविरुद्ध जित निकाल्न संघर्ष गर्नु परेको थियो । जावलाखेलविरुद्ध मनाङले १–० को संघर्षपूर्ण जित निकाल्दा थ्री स्टारले सरस्वतीविरुद्ध २–१ को जित निकालेको थियो ।

छैटौं चरणमा विभागीय टोली एपीएफले दोस्रो जित निकाल्यो । एपीएफले एनआरटीलाई २–१ ले हराएको थियो । च्यासल युथ क्लबले दोस्रो जित दर्ता गर्ने क्रममा हिमालयन शेर्पा क्लबलाई २ –१ ले नै हरायो ।

संकटा क्लबले विभागीय टोली नेपाल पुलिस क्लबलाई २–१ ले नै हरायो । जितसंगै संकटाले लिगको तेस्रो स्थानमा आफुलाई सुरक्षित राख्न सफल भयो ।

लिगको छैटौं चरण सकिदा तीन खेलमा जित एक बराबरी र दुई हार व्यहोरेको नेपाल पुलिस र हिमालय शेर्पा क्रमशः पाँचौ र छैटौं स्थानमा रहेका छन् । च्यासल र एपिएफ ७ अंकका साथ सातौं र आठौं स्थानमा छन् ।

यस्तै सरस्वती ६ अंक जोडेर नवौं,  ५ अंक जोडेर फ्रेन्ड्स दशौं, ४ अंक जोडेर जावलाखेल ११ औं स्थानमा छन् । ब्रिगेड ब्वाइज ४ अंक जोडेर १२ औं स्थानमा रहदा ३ अंक जोडेको मछिन्द्र १३ औं स्थानमा छ । मात्र १ अंक जोडेको एनआरटी लिगको पुछारमा छ ।