राष्ट्रिय ‘बी’ चेस च्याम्पियनसिप भक्तपुरमा सुरु

काठमाडौं। भक्तपुरस्थित नङ्खेलमा राष्ट्रिय ‘बी’ चेस च्याम्पियनसिप मंगलबार सुरु भएको छ। महिला र पुरुष दुवै स्पर्धामा आयोजित प्रतियोगिताका शीर्ष नौ खेलाडी राष्ट्रिय ‘ए’ चेस च्याम्पियनसिपमा छनोट हुनेछन्, जुन माघ दोस्रो साता सञ्चालन हुनेछ।

पाँच दिने प्रतियोगितामा पुरुषतर्फ ४० र महिलातर्फ १७ खेलाडी सहभागी छन्। स्विस प्रणालीको आधारमा महिलातर्फ सात राउन्ड र पुरुषतर्फ नौ राउन्डमा प्रतिस्पर्धा गरिनेछ।

पहिलो चरणमा हिमालयन चेस एकेडेमीकी अनरेटेड नायुमा मगरले चितवनकी उजिभानी कँडेललाई पराजित गरिन्। १० वर्षीय नायुमाले १५७० रेटेड उजिभानीविरुद्ध हात पारेको जितसँगै फिडे रेटिङ हासिल गर्ने पक्का गरेकी छन्।

हिमालयन चेस एकेडेमीकै निहाना श्रेष्ठले ‘बाई’ पाएर एक अंक जोडिन्। सोही एकेडेमीकी ज्योत्स्ना महर्जनले १५५२ रेटेड खुसी मुखियासँग बराबरी गर्दै अंक बाँडिन्। विनीता कपाली, सुशीला गुरुङ, इसा गिरी, लक्ष्मी कँडेल र पुनम प्रसाईँले पनि पहिलो चरणमा जित हात पारे।

पुरुषतर्फ फिडे मास्टरद्वय रिजेन्द्र राजभण्डारी र रुपेश जैसवालसहित क्यान्डिडेट मास्टरद्वय मिलन लामा, नवीन तन्डुकरसँगै आशिष् फुयाँल, पुरुषोत्तम सिलवाल, धिरेन राई, १७ खेलाडीले जित हात पार्दै एक अंक बटुले भने प्रसित खनालले ‘वाक ओभर’ पाउँदै अंक जोडे।

अहिले दोस्रो चरणका खेल सञ्चालन भइरहेको छ। सूर्यविनायक नगरपालिकाका मेयर वासुदेव थापाले उद्घाटन गरेपछि प्रतिस्पर्धा सुरु गरिएको थियो।