फाइनल पुग्न जनकपुर र विराटनगर भिड्दै

काठमाडौं। जनकपुर नाइट्सले नेपाल कबड्डी लिग (एनकेएल) मा उत्कृष्ट प्रदर्शन गर्दै राउन्ड रोबिन लिगमा शीर्ष स्थान कब्जा गरेको छ।

राष्ट्रिय खेलकुद परिषद् (राखेप) को त्रिपुरेश्वरस्थित कभर्डहलमा भइरहेको एनकेएलको लिग चरणमा जनकपुरले अपराजित रहँदै चार जित र एक बराबरीसँगै २३ अंक बनाएर शीर्ष स्थान कब्जा गरेको हो। यससँगै जनकपुरले एनकेएलको क्वालिफाइर १ खेल्ने पनि निश्चित गरेको छ।

लिगका शीर्ष दुई टिमले क्वाफिाइर १ खेल्नेछन्। त्यसअनुसार जनकपुर र दोस्रो स्थानमा रहेको विराटनगरवीच क्वालिफाइर १ को प्रतिस्पर्धा सोमबार हुनेछ। क्वालिफाइर १ को विजेता सीधै फाइनलमा प्रवेश गर्नेछ भने हार्ने टिमले फेरि मौका पाउनेछ।

काठमाडौं र धनगढीले सोमबार इलिमिनेटरमा प्रतिस्पर्धा गर्नेछन्। इलिमिनेटरको विजेता र क्वालिफाइर १ मा पराजित टिमवीच क्वालिफाइर २ मा खेल हुनेछ, जसको विजेताले क्वालिफाइर १ को विजेताविरुद्ध एनकेएलको फाइनल खेल्नेछ। फ्रेन्चाइज टिमको प्रतियोगिता एनकेएलको पहिलो संस्करणको फाइनल माघ १८ गते हुनेछ।

मुख्य प्रशिक्षक पार्वती राईले सम्हालेको जनकपुरले राउन्ड रोबिन लिगमा हिमालयन रेइडर्सलाई ३५–२४, धनगढी वाइल्डक्याट्सलाई ३७–३१, विराटनगर ब्यान्डिट्सलाई ४०–३८ र पोखरा लेकर्सलाई ३६–२९ ले पराजित गरेको थियो भने अन्तिम खेलमा घनश्याम रोका मगरको कप्तानीमा रहेको काठमाडौं माभरिक्सविरुद्ध ३९–३९ को रोमान्चक बराबरी खेल्दै अंक बाँडेको थियो।

६ सहरका ६ टिम सहभागी एनकेएलको पहिलो संस्करणमा जनकपुर नाइट्स (२३), विराटनगर ब्यान्डिट्स (२१), काठमाडौं माभरिक्स (१९) र धनगढी वाइल्डक्याट्स (११) ले लिगको शीर्ष चारमा रहँदै प्ले–अफमा स्थान बनाउँदा पुछारका दुई टिम पोखरा लेकर्स (४ अंक) र बुटवलको हिमालयन रेइडर्स (७ अंक) भने लिग चरणबाटै बाहिरिए।

एस्ट्रोनिक्स म्यानेजमेन्टद्वारा आयोजित एनकेएलमा ७ वा त्योभन्दा कम अन्तरको हारमा टिमले १ अंक पाउने प्रावधान छ। जित्ने टिमले ५ अंक र स्कोर बराबरी भएमा ३–३ अंक प्राप्त हुन्छ।