घनश्यामलाई रोक्दै फाइनल पुग्ने विराटनगरको लक्ष्य

काठमाडौं। विराटनगर ब्यान्डिट्सले पहिलो क्वालिफायरको दोस्रो हाफमा जसरी सम्पूर्ण शक्ति लगाएको थियो, त्यसैले फाइनलको हकदार बनिसकेको थियो।

तर, त्रिपुरेश्वरस्थित दशरथ रंगशालामा सोमबार जनकपुर नाइट्ससँग भएको उक्त भेटमा पहिलो हाफमा ११ अंकले पछि पर्नु नै विराटनगरका लागि दुर्भाग्य साबित भयो।

यद्यपि, उक्त खेलमा बलियो पुनरागमन गर्दै दुई अंकको झिनो हार बेहोरेको विराटनगरले आफूलाई फाइनलको हकदार मान्न छाडेको छ। कप्तान कल्याण भुजेल भन्छन्, ‘हाम्रो लक्ष्य भनेको फाइनल खेल्ने हो। यसका लागि बलियो योजना बनाइसकेका छौं।’

विराटनगरले फाइनल प्रवेश गर्न बुधबार यही कोर्टमा हुने दोस्रो क्वालिफायरमा काठमान्डु माभरिक्सलाई पाखा लगाउनुपर्ने हुन्छ। यो खेल बेलुका ६:३० बजे हुनेछ। काठमान्डुलाई हराए विराटनगरले पुन: उपाधिका लागि जनकपुरसँगको भेट नै पक्का गर्नेछ। जुन सहज नभएको कल्याण आफैं स्वीकार्छन्।

‘काठमान्डुको डिफेन्स एकदमै कमजोर छ। तर, रेइडर घनश्याम (रोक्कामगर) एकदमै बलिया छन्। उनलाई रोक्न सक्यौं भने जित्छौं भन्ने आत्मविश्वास छ,’ उनले सुनाए।

यता, काठमान्डुले इलिमिनेटरमा धनगढी वाइल्डक्याट्सलाई ५०–४५ ले पराजित गर्दै विराटनगरसँगको भेट पक्का गरेको हो। कुनै समय धनगढीसँग पछि परिसकेको स्थितिमा कप्तान घनश्यामको उत्कृष्ट प्रदर्शनसँगै काठमान्डुले खेलमा पुनरागमन गरेको थियो।

नेपाली राष्ट्रिय कबड्डी टोलीका कप्तानसमेत रहेका घनश्यामसँग दुई सिजन भारतको प्रो कबड्डी लिग खेलेको अनुभव छ। उनले त्यही अनुभवको सदुपयोग गर्दै काठमान्डुलाई एकपछि अर्को गर्दै सफलता दिलाइरहेका छन्। हुन त लिगचरणको खेलमा पनि विराटनगरले उनै घनश्यामलाई रोक्दै ४४–४३ को रोमाञ्चक जित हासिल गरेको थियो।

यसपल्ट भने चुक नगर्ने काठमान्डुका प्रशिक्षक सरोज सिंह बताउँछन्। ‘विराटनगरको डिफेन्स राम्रो छ। तर, हामी अट्याकिङ मात्रै गर्दैनौं डिफेन्स पनि गर्छौं,’ उनी भन्छन्।