उपाधिमा गोर्खाली रग्बीको बलियो दाबेदारीता

काठमाडौं । डिफेन्डिङ च्याम्पियन गोर्खाली रग्बी क्लबले फिफ्टिन्स रग्बी च्याम्पियनसिपको उपाधिमाथि बलियो दाबेदारीता प्रस्तुत गरेको छ ।  

शनिबार त्रिभुवन आर्मी क्लबलाई ३०-१० ले पराजित गर्दै गोर्खाली रग्बी प्रतियोगिताको उपाधिमा सबैभन्दा बलियो देखिएको हो । 

गोर्खाली मुख्य प्रतिद्धन्दी नेपाली सेनामाथि एकपक्षिय रुपमा हावी बन्दै खेल सहज रुपमा आफ्नो पोल्टामा पार्यो। 

शनिवार नै भएको पहिलो खेलमा अर्को विभागीय टिम एपीएफले नेपाल पुलिस क्लबलाई एकपक्षिय खेलमा ७८-० ले पराजित गरेको थियो। 

राउन्ड रोविन लिगका आधारमा सञ्चालन भएको प्रतियोगितामा गोर्खालीको ४ अंक बनेको छ भने एपीएफ र नेपाली सेनाको २र२ अंक भएको छ। पुलिस भने अंक विहिन छ। 

अब प्रतियोगिताको लिग चरणको अन्तिम खेल आगामी मंगलवार हुनेछ। जहाँ गोर्खालीले नेपाल पुलिससंग तथा एपीएफले त्रिभुवन आर्मी क्लबसँग प्रतिस्पर्धा गर्नेछ ।

समग्र नतिजासंगै लिगमा शीर्ष रहने टोली च्याम्पियन हुनेछ। 

शनिबार गोर्खाली क्लबले शुरुआत देखिनै सेनामाथी दवाव बनाउन सफल भएको थियो। दुई पेनाल्टी मार्फत शुरुमा ६ अंक जोडेपछि सेना पछि पर्यो। जसको फाइदा उठाउँदै गोर्खालीले पहिलो हाफमा १८-३ को अग्रता बनायो। 

दोस्रो हाफमा स्कोर वढाउँदै गोर्खालीले ३० पुर्यायो भने सेना १० अंकमा रोकिएको थियो। गोर्खालीका तर्फबाट एक्लैले १५ अंक बनाएका विजय खड्का खेलको 'म्यान अफ द म्याच' भए। 

एपीएफ र पुलिस बिचको खेलमा भने एपीएफ पूर्णतस् हावी भएको थियो। टोलीले पहिलो हाफमै ४८ स्कोर गरिसकेको थियो। एपीएफले दोस्रो हाफमा स्कोर थप्ने काम भयो। एपीएफ कप्तान विराट श्रेष्ठ खेलको 'म्यान अफ द म्याच' बने।  

गत संस्करणको उपविजेता एपीएफले अघिल्लो खेलमा गोर्खालीसंग अग्रता लिएको खेल गुमाउनुनै एपीएफको दुर्भाग्य बन्यो। अन्तिम दिनको खेल आगामी मंगलवार च्यासल मैदानमा हुनेछ।