इन्डोनेसिया शीर्षमा, नेपाल ब्लुको पुनरागमन
काठमाडौं। पब्जी मोबाइल एसियन सोडाउन दोस्रो दिन इन्डोनेसिया शीर्ष स्थानमा रहन सफल भएको छ। यता, नेपाल ब्लुले पुनरागमन गरेको छ।
ई–स्पोर्ट्स संघ नेपाल (ईशान) को आयोजना र व्यवस्थापनमा भइरहेको अन्तर्राष्ट्रिय प्रतियोगितामा शनिबार सम्पन्न पाँच खेलपछि प्रतिस्पर्धा अझै चुलिएको हो। अब तेस्रो दिन अन्तिम तथा निर्णायक बन्नेछ।
दोस्रो दिनको पहिलो खेलमा भियतनामले चिकन डिनर जित्दै दिनको सानादर सुरुआत गर्यो। दोस्रो खेलमा नेपाल ब्लु टोलीले दमदार पुनरागमन गर्दै चिकन डिनर जितेको हो।
शनिबार भएका पाँच वटै खेलमा फरक टोलीहरूले चिकन डिनर हात पारेसँगै अंक तालिकामा उतारचढाव देखिएको छ। इन्डोनेसिया १२८ अंकसहित शीर्ष स्थानमा यथावत् छ भने पाकिस्तान ११७ अंकसहित दोस्रो स्थानमा रहेको छ।
नेपाल ब्लु टोली ८३ अंकसहित चौथो, नेपाल रातो टोली ८० अंकसहित पाँचौं र नेपाल ह्वाइट टोली आठौं स्थानमा छ। लेबनान १० अंकसहित तालिकाको अन्तिम स्थानमा संघर्षरत देखिएको छ।
भ्यालुएबल प्लेयर सूचीमा इन्डोनेसियाका लालाक्युबिक्यु सबैभन्दा अगाडि छन्। उनले हालसम्म २३ एलिमिनेशन गर्दै २७.७६ भ्यालुएबल अंक बटुलेका छन्।
शीर्ष ५ मा पाकिस्तानका ३ खेलाडी छन्, तर अहिलेसम्म कुनै नेपाली खेलाडी शीर्ष ५ मा प्रवेश गर्न सकेका छैनन्।
प्रतियोगितामा कुल १० लाख रुपैयाँको पुरस्कार राशि छ। शीर्ष ६ टोलीहरूले नगद पुरस्कार प्राप्त गर्नेछन्, जसमा विजेता टोलीलाई ४ लाख रुपैयाँ प्रदान गरिनेछ। साथै, भ्यालुएबल प्लेयर अवार्ड विजेताले पनि नगद पुरस्कार जित्नेछन्।
अब बाँकी रहेको अन्तिम दिन – जेठ २७ गते (मे ११) मा हुने ५ खेल निर्णायक हुनेछन्। जसले पनि उत्कृष्ट प्रदर्शन गर्दै बढी अंक बटुल्नेछ, उसैलाई पब्जी मोबाइल एसियन सोडाउन २०२५ को च्याम्पियन घोषित गरिनेछ।
