घनश्यामसहित ४ खेलाडीको नाम प्रो कबड्डीको अक्सनमा

काठमाडौं। अखिल नेपाल कबड्डी संघले घनश्याम रोकामगरसहित चार नेपाली खेलाडीको नाम भारतीय फ्रेन्चाइज लिग प्रो कबड्डीको १२औं संस्करणको अक्सनमा पठाएको छ।

रेडर घनश्याम नेपाली राष्ट्रिय टोलीका कप्तानसमेत हुन्। उनले यसअघिका दुई संस्करण हरियाणा स्टिलर्सबाट खेलेका थिए। गत संस्करणमा हरियाणाले फाइनलमा पटना पाइरेट्सलाई ३२–२३ ले पराजित गर्दै उपाधि जितेको थियो।

घनश्यामलाई गत संस्करण हरियाणाले रिटेन गरेको थियो। उनले उक्त संस्करण दुई खेल खेल्दै तीन अंक जोडेका थिए। तर, फाइनलमा भने उनले खेल्न पाएका थिएनन्। 

यसपल्ट उनीसहित अलराउन्डर गणेश कार्की, रेडर सुशील चुनारा र अलराउन्डर रामु टमाटाको नाम पनि अक्सनमा पठाइएको संघले जनाएको छ। गत संस्करणको अक्सनमा पनि संघले घनश्याम, गणेश, रामु र लाल मोहरलाई सिफारिस गरेको थियो। तर, घनश्यामबाहेक अन्य कुनै खेलाडी बिक्री भएनन्।