एनपीएल विवाद छानबिन कार्यदलको संयोजक रञ्जनाले दिइन् राजीनामा

काठमाडौं। नेपाल प्रिमियर लिग (एनपीएल) विवाद छानबिन कार्यदलको संयोजक रञ्जना प्रधानले पदबाट राजीनामा दिएकी छन्।

राष्ट्रिय खेलकुद परिषद् (राखेप) की सदस्यसमेत रहेकी उनले बिहीबारदेखि लागु हुनेगरी राजीनामा स्वीकृत गरिदिन अनुरोध गरेकी छन्।

उनले राष्ट्रिय खेलकुद परिषद्का अध्यक्ष तथा युवा तथा खेलकुदमन्त्री तेजुलाल चौधरीसमक्ष राजीनामा पत्र बुझाएकी हुन्। उनले कार्य व्यस्तताको कारण सो जिम्मेवारी सम्हाल्न नसक्ने बताएकी छन्।

बिहीबार मात्रै राखेपका संरक्षक तथा प्रधानमन्त्री केपी शर्मा ओलीले ‘नेसनल हाइ पर्फमेन्स सेन्टर एन्ड स्पोर्टस् साइन्स ल्याब’को उद्घाटन गर्दै खेल क्षेत्रमा राजनीतिक भइरहेको बताउँदै एनपीएलको तयारी तीव्र बनाउन निर्देशन दिएका थिए।

‘जसरी क्रिकेटको क्रेज बढेको छ, यो हाम्रो नेसनल प्राइड हो। देशमा त्यसरी नै एनपीएललाई अगाडि लैजानुपर्छ। यसलाई राष्ट्रियस्तरमा बढाउनुपर्छ। एनपीएलको भव्य तयारी गर्नुस्। यसको आयोजना गर्नुस्। यो खेलिनुपर्छ,’ उनले भनेका थिए।

पछिल्लो समय एनपीएललाई लिएर राखेप र नेपाल क्रिकेट संघ (क्यान)बीच विवाद छ। एनपीएलको हिसाबकिताबका नदेखिएको भन्दै दुई निकायबीच भइरहेको विवादमा ओलीले हात हालेपछि प्रधानले राजीनामा दिएकी हुन्।