एन्फा प्रेसिडेन्ट लिगको विजेताले १० लाख रुपैयाँ पाउने

काठमाडौं। एन्फा प्रेसिडेन्ट लिगको विजेताले १० लाख रुपैयाँ पाउने भएको छ।

अखिल नेपाल फुटबल संघ (एन्फा) को आयोजनामा हुने लिग कार्तिक १९ देखि मंसिर २ गतेसम्म गौरीटार रंगशाला हेटौडा-६, मकवानपुरमा सञ्चालन हुँदैछ। प्रतियोगितामा जिल्ला लिगबाट च्याम्पियन भई प्रदेश लिगबाट छनोट भएका कुल १० टिमको सहभागिता रहनेछ।

सहभागी १० टिमलाई दुई समुहमा विभाजन गरी लिग कम नकआउटको आधारमा खेलहरु खेलाइनेछ । प्रत्येक समुहको विजेता र उपविजेता नकआउट चरणमा प्रवेश गर्ने छ । सेमिफाइनलका चार टिमहरू यसै वर्ष सञ्चालन हुने राष्ट्रिय लिग प्रतियोगितामा सहभागी हुन पाउने छ ।

एन्फाका अनुसार उपविजेताले ५ लाख रुपैयाँ प्राप्त गर्नेछ। फेयर प्ले टिमले ५० हजार, सर्वोत्कृष्ट खेलाडीले ५० हजार र उच्च गोलकर्ताले २५ हजार रुपैयाँ प्राप्त गर्नेछ। उत्कृष्ट गोलकिपरले २५ र प्लेअर अफ द म्याचले ५ हजार रुपैयाँ पाउने छ।

प्रतियोगितामा सहभागी टिमलाई तयारी खर्च ७ लाख रुपैयाँ प्रदान गरिनेछ। प्रतियोगिताको कुल बजेट एक करोड ५४ लाख ५४ हजार ४२५ रुपैयाँ रहेको एन्फाले जनाएको छ।