साम्बाको डेब्युको प्रतीक्षा

काठमाडौं। न्युजिल्यान्डको क्लब वेलिङ्टन फिनिक्स शनिबारबाट सुरु हुने आफ्नो ‘ए’ लिग महिला फुटबल सिजनमा पहिलोपटक नेपाली स्ट्राइकर साबित्रा भण्डारी ‘साम्बा’लाई मैदानमा उतार्ने तयारीमा छ।

अन्तर्राष्ट्रिय स्तरकी गोलमेकर भण्डारीले यसअघि नेपाली राष्ट्रिय टोलीका लागि उत्कृष्ट प्रदर्शन गर्दै कीर्तिमान कायम गरेकी थिइन्। उनको नाममा ६६ अन्तर्राष्ट्रिय गोल छ।

अब उनी ‘ए’ लिग खेल्ने पहिलो नेपाली खेलाडी बन्ने छिन्। वेलिङ्टन फिनिक्सले शनिबार आफ्नो नयाँ सिजनको पहिलो खेलमा क्यानबेरा युनाइटेडको सामना गर्दैछ।

यो खेललाई सबैभन्दा प्रतीक्षित मानिएको छ। यही खेलमा भण्डारीको डेब्यु हुने सम्भावना छ। फ्रान्सको शीर्ष डिभिजन क्लब अभान्ट ग्वेन्ग्याम्पसँगको दुई वर्षे सम्झौता सकिएपछि उनी न्युजिल्यान्डतर्फ मोडिएकी हुन्। यो क्लब न्युजिल्यान्डको भए पनि अस्ट्रेलियन ‘ए’ लिग खेल्दै आएको छ। त्य

साम्बाको फुटबल यात्राले सधैं अनपेक्षित मोड लिएको छ। तर, उनको यो यात्रा सधैं उकालो चढ्दै छ। भारतको महिला सुपर लिगमा २४ खेलमै ६० गोल गरेपछि उनले युरोपेली टोलीको ध्यान खिचेकी थिइन्।

फलस्वरूप २०८० माघमा ग्वेन्ग्याम्प पुगेकी साम्बाले त्यहाँ पहिलो सिजनदेखि नै प्रभाव छोडिन्। दोस्रो सिजनमा त पेरिस सेन्ट-जर्मन (पीएसजी)विरुद्ध ह्याट्रिक नै गरिन्।

यस्तो प्रतिस्पर्धी टोलीविरुद्ध गोल गर्ने नेपाली फुटबल इतिहासमै पहिलो महिला खेलाडी बन्नु सानो उपलब्धि थिएन। तर, समग्रमा खराब प्रदर्शनका कारण दोस्रो सिजनको अन्त्यसँगै टोली रेलिगेसनबाट जोगिन सकेन।

उनले उज्बेकिस्तानमा भएको एएफसी महिला एसियन कप छनोटमा दुई ह्याट्रिकसहित ९ गोल गरिन्, त्यो पनि जम्मा तीन खेलमा। अहिले उनको आत्मविश्वास अझै बढेको देखिन्छ।