पथरी गोल्डकपको उपाधि सिरहाको सलहेशलाई

अर्जुन काफ्ले, पथरी, मोरङ। सलहेश युथ क्लबले पथरी गोल्डकपको उपाधि सिरहाको जितेको छ।

पथरी रंगशालामा शनिबार सम्पन्न फाइनल खेलमा सलहेशले आयोजक पथरी ११ फुटबल क्लबलाई २–१ गोल अन्तरले पराजित गर्दै उपाधि हात पारेको हो।

खेलको सुरुआती अग्रता लिए पनि पथरी ११ त्यो जोगाउन नसक्दा उपाधिविहीन हुन पुग्यो। सलहेशका जय गुरुङ र समीर तामाङले गोल गरे भने पथरी ११ का धीरेन विष्ट क्षेत्रीले एक मात्र गोल फर्काए।

खेलको १८औं मिनेटमा सलहेशका कप्तान कुलदीप कार्कीले पथरीका नीरज परियारलाई डी एरियाभित्र फउल गरेपछि मुख्य रेफ्री श्याम दनुवारले पेनाल्टी दिए। सो अवसरमा धीरेनले गोल गर्दै पथरीलाई १–० को अग्रता दिलाएका थिए।

तर, दोस्रो हाफमा सलहेश आक्रमक बन्यो। ५८औं मिनेटमा सलहेसले पनि पेनाल्टीमार्फत बराबरी गोल फर्कायो। पथरीका गोलकिपर समीर क्षेत्रीले सलहेशका रिर्चाड विल्सनमाथि फउल गरेपछि पाएको पेनाल्टीमा जयले गोल गरे।

६९औं मिनेटमा समीरले वान भर्सेस वानमा निर्णायक गोल गर्दै सलहेशलाई २–१ को जित दिलाए। करिब पाँच हजार दर्शकको उपस्थितिमा भएको फाइनलमा घरेलु दर्शक पथरीको हारसँगै निराश बने।

अन्तिम क्षणसम्म पथरीले गोल फर्काउने प्रयास गरे पनि सलहेशका गोलकिपर रेम्बो चौधरीले उत्कृष्ट बचाउ गर्दै टिमलाई जित दिलाए। विजेता सलहेशले ट्रफीसहित पाँच लाख रुपैयाँ प्राप्त गर्‍यो भने उपविजेता पथरी ११ ले दुई लाख ५० हजार रुपैयाँमा चित्त बुझायो।

खेलको म्यान अफ द म्याच सलहेशका जय गुरुङ घोषित भए। विधागत रूपमा पनि सलहेश हावी रह्यो। उत्कृष्ट गोलकिपर रेम्बो चौधरी, सर्वाधिक गोलकर्ता रिर्चाड विल्सन र उत्कृष्ट प्रशिक्षक राजीप यादव भए।

सर्वोत्कृष्ट खेलाडीको उपाधि पथरी ११ का युकेश तामाङले हात पारे भने उत्कृष्ट रक्षक धीरेन क्षेत्री, उत्कृष्ट मिडफिल्डर सञ्जय लिम्बू र उदयिमान खेलाडी समीर क्षेत्री घोषित भए। उत्कृष्ट खेलाडीले १० हजार रुपैयाँ प्राप्त गरे भने सर्वोत्कृष्ट खेलाडीले २५ हजार रुपैयाँ प्राप्त गरे।

विजेता र उपविजेता टोलीलाई पथरी शनिश्चरे नगरपालिकाका प्रमुख मोहन तुम्वापोले ट्रफी प्रदान गरेका थिए। कार्तिक १५ गतेदेखि सुरु भएको प्रतियोगितामा राजधानीका तीन र भारतको एकसहित आठ टिमको सहभागिता रहेको थियो।