लुम्बिनीको पहिलो खेलमै जित

काठमाडौं। लुम्बिनी लायन्सले नेपाल प्रिमियर लिग (एनपीएल)मा विजयी सुरुआत गरेको छ।

बिहीबार सम्पन्न खेलमा लुम्बिनीले ६ विकेटको जित निकालेको हो। जारी प्रतियोगितामा लुम्बिनीको यो पहिलो खेल हो।

यो जितसँगै गत संस्करण खराब प्रदर्शन गरेको लुम्बिनी दोस्रो संस्करण जितबाट सुरुआत गरेको छ। चितवनले भने कर्णाली याक्सलाई ४ विकेटले पराजित गर्दै विजयी सुरुआत गर्को थियो।

चितवन राइनोजले दिएको १४३ रनको लक्ष्य पछ्याएको लुम्बिनीले १८.३ ओभरमा ४ गुमाएर १४६ रन बनायो।

लुम्बिनीको जितमा अलराउन्डर गुल्बादिन नैब चम्किँए। २४ बल खेलेका उनले अविजित रहँदै ३ चौका र ३ छक्कासहित ४४ रनको योगदान दिए।

कप्तान रोहितकुमार पौडेलले ४४ बलमा १ चौकासहित ३९ रन थपिदिए। यी दुईबीचको ६० रनको साझेदारीसँगै लुम्बिनी जितको बाटोमा लम्किएको थियो।

ओपनर सन्दीप जोरा २८, डी'आर्च सर्ट ११ र दीलिप नाथ १० रनमा आउट हुँदा जजे स्मिथ ४ रनमा अविजित रहे।

चितवनका रिजन ढकालले सर्वाधिक २ विकेट लिए। ३ ओभर बलिङ गरेका उनले १७ रन खर्चिए। सोहेल तान्विरको नाममा १ विकेट रह्यो।

त्यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको चितवनले निर्धारित २० ओभरमा ७ विकेट गुमाउँदै १४२ रनको योगफल खडा गरेको थियो।

चितवनका रवी बोपाराले सर्वाधिक ६६ रन बनाए। उनले ५५ बलमा ४ चौका र ३ छक्का प्रहार गरे। कप्तान कुशल मल्लले १८ बलमा १ छक्कासहित २१ रन बनाए।

सैफ जैब १५, देव खलान १४ र दीपक बोहरा १० रनमा पेभिलियन फर्किए। लुम्बिनीका रुबेन ट्रम्पलमनले सर्वाधिक ३ विकेट अविनाश गौतम र नैब समान २ विकेट खातामा राख्न सफल भए।