एसेजमा १०० विकेट लिने पहिलो बायाँहाते तीव्र बलर बने स्टार्क

काठमाडौं। अप्टस स्टेडियममा जारी एसेज टेस्टको पहिलो दिन अस्ट्रेलियाका स्टार बलर मिचेल स्टार्कले सानदार बलिङ गर्दै इङ्ग्ल्यान्डलाई सुरुमै दबाबमा पारे। उनले १२.५ ओभरमा ४ मेडनसहित ५८ रन खर्चिए ७ विकेट झारे।

जो रुटलाई (०) मार्नस लाबुशेनमार्फत क्याच गराउँदै स्टार्कले एसेजमा आफ्नो १००औं विकेट हासिल गरे। यससँगै उनी एसेज इतिहासमा १०० विकेट पूरा गर्ने २१औं बलर बनेका छन्।

उनले एशेजमा १०० विकेट लिने पहिलो बायाँहाते तीव्र बलर बन्ने अनौठो कीर्तिमान पनि बनाएका छन्। यसअघि कुनै पनि बायाँहाते पेसरले यो उपलब्धि हात पारेका थिएनन्। उनी एसेजमा १०० विकेट लिने अस्ट्रेलियाका १३औं बलर पनि बने।

अनफिट प्याट कमिन्स र चोटिल जोश हेजलवुडको अनुपस्थितिमा स्टार्कले स्कट बोलान्ड र डेब्यूट्यान्ट ब्रेन्डन डगेटसँगै पेस आक्रमणको जिम्मेवारी सम्हाले।

यसका साथै अब स्टार्कसँग पाकिस्तानका महान् बलर वसीम अकरमको लेफ्ट–आर्म पेसरका रूपमा सर्वाधिक ४१४ टेस्ट विकेटको रेकर्ड तोड्ने सम्भावना बलियो बन्दै गएको छ। स्टार्क अहिलेको फर्ममा रहेसम्म यो सिरिजमै उक्त उपलब्धि नजिक पुग्ने आँकलन गरिएको छ।