जुडका भाइ जोबलाई दुई खेलमा प्रतिबन्ध

काठमाडौं। बोरुसिया डर्टमुन्डका मिडफिल्डर जोब बेलिङ्घमलाई बुन्डेसलिगाका आगामी दुई खेलका लागि प्रतिबन्ध लगाइएको छ। फ्राइबर्गविरुद्धको खेलमा रातो कार्ड पाएका कारण उनलाई प्रतिबन्ध गरिएको हो।

रियल मड्रिडका स्टार जुड बेलिङ्घमका कान्छा भाइ जोबलाई आइतबार भएको खेलको ५३औं मिनेटमा फिलिप ट्रोयमाथि फाउल गरेपछि मैदानबाट बाहिर पठाइएको थियो।

डर्टमुन्डका गोलकिपर ग्रेगर कोबेलले बल गुमाएपछि ट्रोय सीधै गोल गर्ने अवस्थामा थिए। उनलाई रोक्ने क्रममा जोबले फाउल गरेका थिए। त्यो बेला डर्टमुन्ड १–० ले अघि थियो। तर, खेल अन्ततः १–१ को बराबरीमा सकियो।

जर्मन फुटबल महासंघले सोमबार आफ्नो खेल अदालतले उक्त घटनालाई ‘अनस्पोर्टिङ बिह्यावियर’ ठहर गर्दै दुई खेलको प्रतिबन्ध लगाएको जनाएको छ।

योसँगै २० वर्षीय जोबले गत जुनमा सन्डरल्यान्डबाट डर्टमुन्डमा अनुबन्धित भएपछि पहिलो पटक बुन्डेसलिगा खेल गुमाउने भएका छन्। उनी आफ्ना दाजु जुडको पदचिन्ह पछ्याउँदै डर्टमुन्ड आएका हुन्।

अब जोबले शुक्रबार हुने बोरुसिया मोन्चेनग्लाडबाखविरुद्धको खेल र जनवरी ९ मा हुने आइन्त्राख्ट फ्रान्कफुर्टविरुद्धको ‘अवे’ खेल गुमाउनेछन्।

यो प्रतिबन्धले डर्टमुन्डमा उनको उतार–चढावपूर्ण सुरुआतलाई अझ प्रष्ट पारेको छ। यही क्लबबाट उनका दाजु जुड विश्वकै उत्कृष्ट मिडफिल्डरमध्ये एकका रूपमा स्थापित भएका थिए।

जोबले गत सिजनको अन्त्यतिर क्लब विश्वकपमा डर्टमुन्डका लागि डेब्यु गरेका थिए। दोस्रो खेलमै गोल पनि गरेका थिए। तर, त्यसयता उनले क्लबका लागि फेरि गोल गर्न सकेका छैनन्।

यस सिजन सबै प्रतियोगितामा डर्टमुन्डका २३ खेलमध्ये सबैमा खेले पनि उनले १० खेल मात्र सुरुआती एकादशमा स्थान पाएका छन्।