एएफसी नेसन्स लिग नेपाललाई फाइदा कि घाटा ?

काठमाडौं। युरोपमा सफल रूपमा सञ्चालन हुँदै आएको नेसन्स लिगको अवधारणालाई पछ्याउँदै अब एसिया पनि सोही बाटोमा हिँड्ने भएको छ।

एसियन फुटबल कन्फेडेरेसन (एएफसी) ले पनि मैत्रीपूर्ण खेललाई प्रतिस्पर्धात्मक प्रतियोगितामा परिणत गर्न एएफसी नेसन्स लिग सञ्चालन गर्ने निर्णय गरेको हो।

एएफसीले आफ्ना ४७ सदस्य राष्ट्रहरूलाई समेटेर लिग आयोजना गर्न लागिएको जानकारी दिएको छ। एसियाली राष्ट्रका टोलीलाई नियमित र गुणस्तरीय प्रतिस्पर्धाको अवसर दिन यो निर्णय लिइएको एएफसीको भनाइ छ।

एएफसीले लिग कहिले सुरु हुन्छ भनेर ठ्याक्कै बताएको छैन। तर, प्रतियोगिता फिफाको अन्तर्राष्ट्रिय ब्रेकको समयमा, विश्वकप र एसियन कप छनोटका खेल नभएको बेला आयोजना गरिनेछ। हाल एएफसीका सदस्य राष्ट्र ४७ भए पनि फिफाको सदस्यता भने ४६ राष्ट्रसँग मात्र छ।

प्रशान्त महासागरीय टापु नर्दन मारियाना आइल्यान्ड फिफाको सदस्य राष्ट्रमा समावेश छैन। फिफा वरीयताका आधारमा हेर्दा नेपाल यस एसियाको ३७औं स्थानमा छ।

यदि एएफसीले युरोपियन फुटबल महासंघ (युइएफए) को मोडेलअनुसार लिग संरचना तयार गरेमा नेपाललाई तेस्रो वा चौथो स्तरमा राखिन सक्ने अनुमान गरिएको छ। युइएफए नेसन्स लिगमा तल्लो स्तरका टोली समूह विजेता बनेमा माथिल्लो तहमा बढुवा हुने व्यवस्था छ।

कमजोर प्रदर्शन गर्ने टोली घटुवा हुन्छन्। यही प्रणाली लागू भएमा नेपालले पनि समूह विजेता बनेर माथिल्लो स्तरमा उक्लने अवसर पाउन सक्छ। लिग सुरु भएसँगै नेपालले विश्वकप छनोट र एएफसी एसियन कप छनोटबाहेक पनि नियमित अन्तर्राष्ट्रिय खेल खेल्ने सुनिश्चित अवसर पाउनेछ।

यसले राष्ट्रिय टोलीको खेल संख्या बढाउने मात्र होइन, फिफा विन्डोमा प्रतिद्वन्द्वी खोज्नुपर्ने झन्झटबाट अखिल नेपाल फुटबल संघ (एन्फा) लाई समेत राहत मिल्ने अपेक्षा गरिएको छ।