तीन सिजनमै पाल्मरको चार ह्याट्रिक

काठमाडौं। चेल्सीका इङ्लिस स्टार कोल पाल्मरले क्लब इतिहासमा नयाँ कीर्तिमान कायम गरेका छन्।

चेल्सीबाट तेस्रो सिजन खेलिरहेका २३ वर्षीय पाल्मरले यस अवधिमै चारवटा ह्याट्रिक पूरा गर्दै इतिहासको पानामा आफ्नो नाम लेखाएका छन्।

प्रिमियर लिगअन्तर्गत शनिबार भएको खेलमा चेल्सीले उल्भरह्याम्पटनलाई ३–१ गोलले पराजित गर्दा तीनै गोल पाल्मरले गरेका थिए।

यही ह्याट्रिकसँगै प्रिमियर लिगमा चेल्सीका लागि सबैभन्दा धेरै ह्याट्रिक गर्ने खेलाडीको कीर्तिमान अब एक्लै पाल्मरको नाममा पुगेको छ। यसअघि जिमी फ्लोयड–हासेलबैंक, डिडिए ड्रोग्बा र फ्रान्क ल्याम्पार्डले चेल्सीका लागि तीन–तीन ह्याट्रिक गरेका थिए।

पाल्मरले चेल्सीका लागि प्रिमियर लिगमा सबैभन्दा छिटो ह्याट्रिक गर्ने शीर्ष तीन स्थान पनि आफ्नो नाममा राखेका छन्। उनले एभरटनविरुद्ध २९ मिनेटमै, ब्राइटनविरुद्ध ३१ मिनेटभित्र ह्याट्रिक पूरा गरेका थिए।

यी उपलब्धिसँगै उनले अर्को अद्वितीय कीर्तिमान पनि बनाएका छन्। प्रिमियर लिगको इतिहासमा पहिलो हाफमै तीन पटक ह्याट्रिक गर्ने एकमात्र खेलाडी पाल्मर नै हुन्। ह्याट्रिकसँगै पाल्मर चेल्सीका लागि ५० गोल पूरा गर्ने ३१औं खेलाडीसमेत बनेका छन्।

चेल्सीका प्रशिक्षक लियाम रोजेनियोर भन्छन्,‘पाल्मर साँच्चिकै एक असाधारण खेलाडी हुन्।’