डिफेन्डिङ च्याम्पियन एनआरटी अन्तिम चारमा

नमिन ढकाल, इलाम। आदित्य शाक्यको निर्णायक गोलसँगै चित्लाङ एफसीलाई हराउँदै डिफेन्डिङ च्याम्पियन न्यूरोड टिम (एनआरटी) तेस्रो इलाम गोल्डकपको सेमिफाइनल प्रवेश गरेको छ।

एनआरटी १–० को जितसँगै सेमिफाइनल समीकरण पूरा भएको छ। प्रतियोगिताको पहिलो सेमिफाइनल खेलमा बुधबार मच्छिन्द्र एफसी र पथरी–११ भिड्दैछन्।

मछिन्द्रले एन पेनाङ मलेसिया र पथरीले घरेलु टिम रेडहर्स एफसीलाई टाइब्रेकरमा हराउँदै अन्तिम ४ मा स्थान सुरक्षित गरेका हुन्। दोस्रो सेमिफाइनल खेलमा एनआरटीले रोलिङ क्लब धुलाबारीसँग प्रतिस्पर्धा गर्नेछ।

१८औं मिनेटमा पाएको फ्रिकिकलाई गोलमा परिणत गर्दै शाक्यले एनआरटीलाई अन्तिम ४ मा प्रवेश गराएका हुन्। विज्ञान खड्कालाई चेतनकुमार थारुले फाउल गरेपछि पाएको अवसरलाई आदित्यले सिधै जाली चुमाए। दुवै टिमले केही अवसरलाई गोलमा परिणत गर्न सकेनन्।

तेस्रो मिनेटमा नै सोलोमनले गरेको प्रहारलाई एनआरटीका गोलरक्षक विशाल सुनारले बचाएका थिए। ३३औं मिनेटमा एनआरटीका विज्ञानको प्रहारलाई चित्लाङका गोलरक्षक चन्द्रसुन्दर श्रेष्ठले बचाएका थिए।

खेलको ‘म्यान अफ दी म्याच’ गोलकर्ता शाक्य घोषित हुँदै ८ हजार एक सय प्राप्त गरे।