विश्वकपअघि विलियम्स पनि घाइते

काठमाडौं। निको विलियम्स चोटग्रस्त भएपछि स्पेनलाई विश्वकपअघि चिन्ता थपिएको छ।

एथलेटिक बिल्बाओ आइतबार घरेलु मैदान सान मामेसमा भ्यालेन्सियासँग १–० ले पराजित हुँदा विलियम्स पहिलो हाफ सकिनुअघि नै मैदान छाड्न बाध्य भएका हुन्। २३ वर्षीय फरवार्डले ह्यामस्ट्रिङमा समस्या महसुस गरेपछि खेलको ३७औं मिनेटमा उनका दाजु इनाकी विलियम्सले उनको स्थान लिएका थिए।

विलियम्सले यसअघि पनि चोटका कारण केही सातासम्म मैदानबाहिर रहेका थिए। क्लबले आइतबार लागेको चोटबारे विस्तृत जानकारी सार्वजनिक गरेको छैन। इनाकीले खेलपछि भने,‘उनी निकै लँगडाउँदै थिए। यस प्रकारको पीडा उनले पहिले कहिल्यै महसुस गरेका थिएनन्। अहिलेको अवस्थामा यो चिन्ताजनक विषय हो। अब हामी राम्रो समाचारको प्रतीक्षा गर्नेछौं।’

विलियम्स स्पेन राष्ट्रिय टोलीका नियमित सदस्य हुन्। उनले आक्रमणपंक्तिमा लामिन यमलसँग मिलेर खेल्दै आएका छन्। तर, बार्सिलोनाका युवा स्टार यमल पनि हाल चोटग्रस्त छन्। स्पेनका मुख्य प्रशिक्षक लुइस दे ला फुएन्तेले सोमबार विश्वकपका लागि ५५ खेलाडीको प्रारम्भिक टोली घोषणा गर्नेछन्।