'जीवनभर एपीएफबाट खेल्छु'

काठमाडौं । नेपाली राष्ट्रिय महिला भलिबल टिमकी सदस्य निरुता ठगुन्ना एपीएफ क्लबमा आबद्द भएकी छिन् ।

सशत्र प्रहरीको सिपाही पदमा जागिरे भएसँगै ओपन स्पाइकर निरुता एपीएफ क्लबमा आबद्द भएकी हुन् ।

लोक सेवा आयोगले सिपाही पदका लागि लिएको खुल्ला परिक्षामा पास हुँदै निरुता सशत्र प्रहरीको जागिरे भएकी हुन् । विभागको जागिरे भएसँगै राष्ट्रिय खेलाडी निरुता क्लबमा आबद्द भएकी हुन् ।

सशत्र प्रहरीको भलिबल कोअर्डिनेटर तथा इन्स्पेक्टर विजय केसीले निरुता विभागको जागिरे भएसँगै क्लबमा अनुबन्ध भएको खेलपाटीलाई जानकारी गराए ।

'निरुताले लोक सेवाको खुल्ला परिक्षाबाट सिपाहीमा नाम निकालेकी थिइन् । सशत्रको जागिरे भएपछि उनी क्लबमा आएकी हुन् । अब उनले एपीएफबाट खेल्ने छिन्,' विजयले भने ।

निरुताले बुधबार सुरु हुने होङ्गान्जी न्यू डायमण्ड महिला भलिबल प्रतियोगिताबाट एपीएफ क्लबमा डेब्यु गर्ने सम्भावना रहेको छ ।

निरुताले सशत्रमा जागिर गर्न परिवारबाट सहयोग मिलेको र जागिरको लागि आफुले नाम निकालेर एपीएफ क्लबमा आबद्द भएको बताईन् ।

'एपीएफमा जाँदा परिवारबाट सहयोग मिल्यो । त्यहिँबाट भलिबल खेल्न परिवारले सुझाव दिएको थियो,' निरुताले भनिन्, 'सिपाहीका लागि आवेदन खुलेको थियो र मैले पनि आवेदन दिएको थिए ।'

निरुता गत साताबाटै एपीएफको प्रशिक्षणमा सामेल भएकी थिइन् । निरुता एपीएफबाट खेल्न समेत निकै उत्साहित छिन् ।

नेपाली महिला भलिबलमा एकछत्र राज गरिरहेको एपीएफबाट जीवनभर खेल्ने निरुताको धोको छ ।

'एपीएफ धेरै राम्रो टिम हो । यो टिमबाट खेल्न पाउँदा धेरै उत्साहित छु । एपीएफमा हुँदा खुशी छु,' निरुताले भनिन्, 'अब जिन्दगीभर एपीएफबाट खेल्छु ।'

गत कात्तिकमा राष्ट्रिय टिममा डेब्यु गरेकी निरुता यस अघि अर्को विभागीय टिम आर्मीबाट खेल्ने गर्थिन् । तर, आर्मीको परिचर पदमा जागिरे निरुताले गत जेठमा घरायसी र व्यक्तिगत कारण देखाउदै राजिनामा दिएकी थिइन् ।

जेठमा आर्मी छाडेपछि निरुता पहिलो पटक घरेलु प्रतियोगिता खेल्ने तयारीमा छिन् । निरुताले पछिल्लो पटक शेरबहादुर खड्का मेमोरियल भलिबल प्रतियोगिता खेलेकी थिइन् । उनले प्रदेश ५ मा भएको आठौं राष्ट्रिय खेलकुद आर्मीबाटै खेलेकी थिइन् ।

घरेलु लिग नखेलेपनि निरुताले राष्ट्रिय टिमबाट भने खेल्दै आएकी थिइन् । नेपालले गत कात्तिकमा बंगलादेशमा भएको एभीसी सेन्ट्रल जोन महिला भलिबलको स्वर्ण जित्दा निरुता टिममा थिइन् ।

यस्तै घरेलु भूमिमा भएको १३ औं दक्षिण एसियाली खेलकुद (साग) मा रजत जित्दा टिममा रहेकी थिइन् ।