दोलखा चेस होम नेपालको एकल अग्रता 

ललितपुर । छैठौं संस्करणको तुल्सिलाल स्मृति राष्ट्रिय क्लब टिम च्याम्पियनसिप बुद्धिचाल प्रतियोगिताको तेश्रो दिन पाँचौं चरणको समाप्तिमा दोलखा चेस होम नेपाल एकल अग्रता लिन सफल भएको छ । 

बुधबार सम्पन्न चौंथो चारणमा आयोजक ललितपुर स्पोर्ट्स क्लबमाथि जित हात पारेको थियो भने पाँचौं चरणमा थापाथली पार्क चेस क्लबलाई पराजित गर्दै १० अंकसहित दोलखा एकल अग्रता लिन सफल भएको हो ।

दोलखाका वर्तमान नेपाल च्याम्पियन एफएम रुपेश जैसवालले बुधबारको खेलमा राजन सुवेदीलाई हराए भने क्षितिज भण्डारीसँग बराबरी खेले । दोश्रो बोर्डमा खेलिरहेका सुश्रुत दहालले सुरोज महर्जनमाथि जित निकाले भने सुशिल चौधरीसँग बराबरी खेले । 

महान नर्सिङले रिसोन थापासँग बराबरी खेले भने सेम सुब्बामाथि विजयी प्राप्त गरे । गल्स र अण्डर १६ युवा अन्तर्गत डब्लुएफए सुजना लोहनीले आयुष देमन रौरालाई पराजित गर्दै अनुपजंग शाहसँग बराबरी खेलेकी छिन् । राष्ट्रिय क्लब टिम च्याम्पियनसिपको मूल मर्म अनुरुप दोलखाका चारै जना खेलाडीले टिमलाई जिताउन महत्वपूर्ण योगदान पुर्याए । 

अर्को टिमतर्फ आयोजक ललितपुर स्पोर्ट्स क्लब चौंथो चरणमा दोलखा चेस होमसँग पराजित भए पश्चात् पुनः पाँचौं चरणमा भक्तपुर जिल्ला बुद्धिचाल संघलाई पराजित गर्यो र नकआउट चरणमा प्रवेश गर्ने प्रवल सम्भावनालाई जिवित राख्न सफल भएको छ ।

आयोजक ललितपुरका राजन सुवेदीले पुरुषोत्तम दहालसँग बराबरी गरेका छन् भने सुरोज महर्जनले विक्रम चोकामीलाई हराए । रिसोन थापाले स्वर्णिम दुवाललाई पराजित गरे र आयुष देमन रौराले अभिक शाहसँग बराबरी गर्दै टिमलाई महत्वपूर्ण जित दिलाए । ललितपुर स्पोर्ट्स क्लब ८ अंकसहित दोश्रो स्थानमा रहेको छ । 

मकवानपुर जिल्ला बुद्धिचाल संघले ललितपुर महानगरपालिकालाई पराजित गर्दा सीएम कृष्ण थापाले सीएम सजिन महर्जनसँग हार व्यहोरे भने सिन्देश्वर दाशले कमल श्रेष्ठलाई, सुदेन टुईटुईले आर्य मुकारुङलाई र अनुशा गौतमले पुनम प्रसाईंलाई पराजित गरे ।

त्यस्तै पाँचौं चरणमा मकवानपुर जिल्ला बुद्धिचाल संघका सीएम कृण थापाले गोदावरी नगरपालिकाका धिरेन राईलाई र अनुशा गौतमले सान्ती धिमाललाई हराइन् । सिन्देश्वर दाशले सानुभाई महर्जनसँग बराबरी गर्दा सुदेन टुईटुई सुभम न्यौपानेसँग पराजित भए । मकवानपुरले ८ अंक प्रोग्रेसिप आधारमा तेश्रो स्थानमा रहेको छ ।  

पाँचौं चरणको नतिजा अनुरुप कोसी प्रदेश चेस संघ र थापाथली चेस पार्क समान ७ ७ अंक जोड्दै नकआउट चरणमा पुग्ने सम्भावनालाई जिवितै राखेका छन् । भक्तपुर जिल्ला बुद्धिचाल संघ, दोलखा जिल्ला बुद्धिचाल संघ र लुम्बिनी इभेन्ट म्यानेज्मेन्ट समान ६-६ अंक जोडेर क्रमशः छैटौं, सातौं र आठौं स्थानमा रहेका छन् । प्रतियोगितामा गोदावरी नगरपालिका, पुल्चोक चेस क्लब र कास्की जिल्ला बुद्धिचाल संघ समान ५-५ अंकसहित नवौं, दशौं र एघारौं स्थानमा रहेका छन् । 

यसैगरी भोलि बिहीबार बिहान नौ बजे शुरु हुने महत्वपूर्ण खेलहरुमा मकवानपुर जिल्ला बुद्धिचाल संघले दोलाखा चेस होमसँग, थापाथली पार्क चेस क्लबले ललितपुरसँग, कोसी प्रदेश चेस संघले दोलखा चेस संघसँग, लुम्बिनीले भक्तपुरसँग र कास्कीले गोदावरीसँग नगरसँग प्रतिस्पर्धा गर्नेछन् । सातौं चरणको खेल पश्चात उत्कृष्ट चार टिमले नकआउट चरणमा प्रवेश गर्नेछन् । 

प्रतियोगिताका संयोजक राजु ताम्राकारका अनुसार विजेता टिमले नगद पुरस्कार २ लाख, उपविजेताले १ लाख २० हजार, तेस्रो स्थान प्राप्त गर्ने टिमले ६० हजार र चौथो हुने टिमलाई ४० हजार नगद पुरस्कार प्रदान गरिनेछ। 

प्रत्येक बोर्डमा प्रथम हुने ४ जना खेलाडीहरुलाई जनही १० हजार पुरस्कारको व्यवस्था गरिएको छ।