पहिलो दिन सद्भाव, ईदान्त र अवानी शीर्ष स्थानमा

काठमाडौँ। नेपाल गल्फ संघद्वारा आयोजित फाल्डो जुनिअर टूर नेपाल च्याम्पियनसिपको पहिलो दिन सद्भाव आचार्य, ईदान्त सिंह साउद र अवानी राई आ–आफ्नो उमेर समूहमा शीर्ष स्थान रहेका छन्।

रोयल नेपाल गल्फ क्लबमा भएको च्याम्पियनसिप अन्तर्गत पुरुष १७ देखि २१ वर्ष उमेर समूहमा राष्ट्रिय टिमका सदस्य सद्भाव आचार्य ५–अन्डर ६३ को उत्कृष्ट स्कोर सहित शीर्षस्थान रहे। उनले संसार बिकेमाथि १३ स्ट्रोकको फराकिलो अग्रता बनाएका छन्।

सद्भावले फ्रन्ट नाइन २–अन्डर ३२ मा सकाए। पहिलो, दोस्रो, चौथो र नवौँ होलमा एक–एक सट बचाए। तर ५–पारको तेस्रो होलमा डबल बगी खेपे। यसपछि ब्याक नाइनमा दशौंदेखि १३औँ होलमा लगातार चार बर्डीको सफलता प्राप्त गरे। तर १८औँ होलमा एक सट खेर फाले र ब्याक नाइन ३–अन्डर ३१ मा पुरा गरे।

दोस्रो स्थानमा रहेका संसारले ८–ओभर ७६ मा पहिलो दिनको खेल सकाउने क्रममा उनले फ्रन्ट नाइन ३–ओभर ३७ र ब्याक नाइन ५–ओभर ३९ मा सकाए। १०–ओभर ७८ को स्कोरमा स्वप्निल भट्टराई तेस्रो स्थानमा रहेका छन्।

पुरुषकै १२ देखि १६ वर्ष उमेर समूहमा ईदान्त सिंह साउद १६–ओभर ८४ सहित सिद्धान्त सापकोटालाई २ स्ट्रोकले पछि पार्दै शीर्षस्थानमा रहेका हुन। उनले फ्रन्ट नाइन ७–ओभर ४१ र ब्याक नाइन ९–ओभर ४३ मा पुरा गरे। १८–ओभर ८६ को स्कोरमा सिद्धान्त दोस्रो स्थानमा छन्। यसैगरी सोहम अग्रवाल र दीपक बहादुर कामी २१–ओभर ८९ सहित संयुक्तरुपमा तेस्रो स्थानमा छन्।

महिला खुल्लातर्फ अवानी राई २०–ओभर ८८ सहित शीर्षस्थानमा रहेकी छिन। उनले आइन्स्टिना टण्डनलाई ५ स्ट्रोकले पछि पारिन। आइसटिनाले २५–ओभर ९३ को स्कोर दर्ज गरिन्।

५४ होलको तीन दिने प्रतियोगितामा पुरुषतर्फ २७ र ४ महिलागरी कुल ३१ खेलाडीको सहभागिता रहेको छ। तीन विधाका विजेता खेलाडीहरूले फाल्डो सिरिज एसिया फाइनल खेल्न पाउनेछन्। प्रतियोगिता सकिएपछि तीन विधाको विजेता खेलाडीको स्कोर संघले फाल्डो फाउन्डेसनलाई पठाउने र त्यसपछि स्पेन वा भियतनाममा नेपालका खेलाडीले देशको प्रतिनिधित्व गर्न पाउने छन्।

प्रतियोगितामा काठमाडौँबाहेक पोखरा, धरान र चितवनका खेलाडीले सहभागिता रहेको छ। यो प्रतियोगिता सन २०१२ देखि निरन्तर रूपमा सञ्चालन हुँदै आएको थियो। कोभिडपछि रोकिएको प्रतियोगिता हालै नेपाल गल्फ संघले फाल्डो सिरिजसँग तीन वर्षको सम्झौतासँगै पुनः सुचारु भएको हो ।