न्यु डायमन्डमाथि सानदार जित निकाल्दै एपिएफ फाइनलमा

पोखरा। सहज जित निकाल्दै विभागीय टोली एपिएफ क्लब प्रचण्ड कप राष्ट्रिय महिला भलिबल प्रतियोगिताको फाइनलमा प्रवेश गरेको छ।

पोखरा रंगशालास्थित कभर्डहलमा शुक्रबार सम्पन्न दोस्रो सेमिफाइनलमा एपिएफले न्यु डायमन्ड युथ स्पोर्ट्स क्लबलाई ३–० को सोझो सेटमा पराजित गरेको हो। पहिलो खेल नेपाल पुलिस क्लबसँग ३–० ले गुमाएको एपिएफले भने स्टेप रामपुरमाथि सोही सेटको जित निकाल्दै सेमिफाइनलमा स्थान बनाएको थियो। 

योसँगै उपाधिका लागि दुई विभागीय टोली एपिएफ र पुलिस भिड्ने भएका छन्। यी दुईबीचको खेल शनिबार हुनेछ। शुक्रबार नै भएको पहिलो सेमिफाइनलमा एभरेस्ट भलिबल क्लबलाई ३–० को सोझो सेटमा पाखा लगाउँदै पुलिस उपाधिनजिक पुगेको थियो।

समूहचरणमा गण्डकी प्रदेश भलिबल संघ र एभरेस्टलाई ३–० को सोझो सेटमा पाखा लगाउँदै न्यु डायमन्ड सेमिफाइनलमा पुगेको थियो। तर, न्यु डायमन्डले महत्त्वपूर्ण खेलमा उक्त लय कायम राख्न सकेन। उसले पहिलो सेट २५–१७ ले गुमाएको थियो।

दोस्रो सेटमा पुनरागमन गर्ने प्रयास गरेको थियो। एक समय न्यु डायमन्ड २४–२५ को स्थितिमा थियो। तर, एपिएफले उत्कृष्ट खेल प्रदर्शन गर्दै उक्त सेट पनि २६–२४ ले आफ्नो बनायो।

तेस्रो तथा अन्तिम सेटमा भने एपिएफले न्यु डायमन्डलाई कुनै अवसर नै दिएन र खेल २५–१९ ले आफ्नो पक्षमा पार्‍यो।