पोखरामा मोटर स्पोर्ट्सको अभिमुखिकरण कार्यक्रम

पोखरा । गण्डकी अटोमोबाइल्स एसोसिएसनको संयोजन तथा नेपाल अटोमोबाइल्स एसोसिएसन, मार्सल एन्ड ट्रेनिङ कमिसनको आयोजनामा मोटर स्पोर्ट्स सम्बन्धि अभिमुखिकरण कार्यक्रम पोखरामा सञ्चालन भएको छ । 

गण्डकी प्रदेश खेलकुद परिषदका सचिव ध्वज कुमार लामाले गण्डकी क्षेत्रमा मोटर स्पोर्ट्सका विभिन्न कार्यक्रम भइरहेको सन्दर्भ उल्लेख गर्दै मोटर स्पोर्ट्सलाई सुरक्षित गर्नका लागि युवा बीच गरिएको कार्यक्रम महत्वपूर्ण रहेको बताए ।

उनले आगामी दिनमा मोटर स्पोर्ट्सलाई अझै सुरक्षित बनाउन र युवाको सहभागिता वृद्धि गर्न यसले भूमिका खेल्ने अपेक्षा गर्दै यसका लागि आयोजकप्रति आभार व्यक्त गरे ।

कार्यक्रममा नासा नेपाल, मार्सल एन्ड ट्रेनिङ कमिसनका सचिव आशीष रौनियारले मोटर स्पोर्ट्सका विविध विषयमा प्रस्तुतीकरण दिए । जसमा मोटर स्पोर्ट्स इभेन्ट व्यवस्थापन, मार्सलिङ, इभेन्ट गाइडलाइन, सेफ्टी तथा इभेन्ट क्यालेन्डर जस्ता विषय थिए । 

सहभागीले मोटर स्पोर्ट्स सम्बन्धी विविध जानकारी लिनुका साथै मोटर स्पोर्ट्स कार्यमा संलग्न हुनका लागि आवश्यक प्राविधिक ज्ञान पाएका थिए । 

अभिमुखिकरण कार्यक्रममा मोटर स्पोर्ट्सको विश्वव्यापी संस्था एफआईए वर्ल्ड काउन्सिल मेम्बर गोविन्द भट्टराई, गण्डकी अटोमोबाइल्स एसोसिएसनका अध्यक्ष शिव श्रेष्ठ र युथ फर रोड सेफ्टी इन नेपालका संयोजक किरण धिताल लगायतले सहजीकरण गरेका थिए ।

सहभागीले यस्ता कार्यक्रम आगामी दिनमा समेत आयोजना गर्न र अझै थप ज्ञान प्रदान गर्न आग्रह गरेका थिए । 

कार्यक्रमको अन्त्यमा गण्डकी अटोमोबाइल्स एसोसिएसनका अध्यक्ष शिव श्रेष्ठले यो वर्ष मोटर र्याली, ट्रान्स हिमालय एड्भेन्चर, पोखरा मोटो इन्ट्युरो, गण्डकी अटोक्रस र डीटी एमएक्स च्याम्पियनसिप सिरिजको आयोजना, आवद्धता तथा सहयोग गरिने घोषणा गर्नुका साथै मार्सल ट्रेनिङ लगायतका विभिन्न कार्यक्रम गरिने बताए । 

गण्डकी प्रदेशमा मोटर स्पोर्ट्स सुरक्षित गर्न, इभेन्ट व्यवस्थापन गर्न, दक्ष मार्सल बन्न लगायतका विभिन्न क्षेत्रमा सो अभिमुखिकरण कार्यक्रमले सहयोग पुग्ने अपेक्षा गरिएको छ । 

पोखरा केन्द्रित राइडर, ड्राइभर तथा मोटर स्पोर्ट्समा संलग्न करिव ३० जना सहभागी सो कार्यक्रमका सहभागीलाई प्रमाणपत्र प्रदान गरिएको छ । उनीहरुको रेकर्ड नासा नेपालमा समेत राखिने आयोजकले जनाएको छ ।