चर्चामा लुकाकु

काठमाडौं। रोमेलु लुकाकु यस साता नापोलीमा चर्चाको केन्द्रमा छन्। तर, सकारात्मक कारणले होइन।

लुकाकु मंगलबार प्रशिक्षणमा उपस्थित भएनन्। त्यसपछि क्लबले उनीमाथि “पयुक्त अनुशासनात्मक कारबाही गर्न सकिने चेतावनी दिएको छ। यसमा उनलाई पहिलो टोलीबाट बाहिर राख्ने सम्भावना पनि समावेश छ।

जेसुकै भए पनि लुकाकु सोमबार हुने सिरी ‘ए’ अन्तर्गत एसी मिलानविरुद्धको महत्त्वपूर्ण खेलमा उपलब्ध हुने सम्भावना कम देखिन्छ। उक्त खेल दोस्रो स्थानका लागि प्रतिस्पर्धा हो।

लुकाकुले भने बेल्जियममै बस्नुको कारण स्वास्थ्यसम्बन्धी भएको बताएका छन्। उसामाजिक सञ्जालमार्फत उनले राष्ट्रिय टोलीका चिकित्सकहरूले मांसपेशीसम्बन्धी समस्या रहेको पत्ता लगाएको जानकारी दिएका छन्। यो समस्या नापोलीले पहिचान गर्न नसकेको उनको दाबी छ। यही कारणले उनी अघिल्ला दुई खेलमा बेन्चमै सीमित भएका थिए।

‘नोभेम्बरको सुरुआतमा फर्किएपछि यो दोस्रो समस्या हो, त्यसैले मैले बेल्जियममै रिह्याब गर्ने निर्णय गरें,’ लुकाकुले भने,‘म कहिल्यै नापोलीबाट टाढा हुन सक्दिनँ।’

लुकाकु राष्ट्रिय टोलीसँग जोडिन बेल्जियम गएका थिए। तर, पछि टोलीबाट बाहिरिन बाध्य भए। त्यसपछि उनी अमेरिकामा भएको अमेरिका र मेक्सिकोविरुद्धका मैत्रीपूर्ण खेलका लागि यात्रा गरेनन्।

नापोली र बेल्जियमका उनका सहकर्मी केभिन डि ब्रुयनेले लुकाकु र क्लबबीचको तनाव कम गराउन प्रयास गर्न सक्ने सम्भावना छ।

डि ब्रुयनेले मेक्सिकोसँगको बराबरीपछि भने, ‘म क्लबमा फर्किएपछि परिस्थिति बुझ्नेछु। आवश्यक परे सहयोग गर्ने प्रयास गर्नेछु।’