पौडीमा विश्व कीर्तिमान बनाउन ०.१८ सेकेन्डले चुकिन् म्याकइन्टस

काठमाडौं। क्यानडाकी पौडी खेलाडी समर म्याकइन्टसले सिंगापुरमा जारी विश्व च्याम्पियनसिपमा २०० मिटर बटरफ्लाई जित्दै तेस्रो स्वर्ण पदक आफ्नो नाममा लेखाएकी छन्।

जित हात पार्दा उनी विश्व कीर्तिमाननजिक पुगेकी थिइन्। १८ वर्षीया म्याकइन्टसले २ मिनेट ०१.९९ सेकेन्डमा दूरी पूरा गर्दै रेस जितिन्। सन् २००९ मा चिनियाँ पौडीबाज लिउ जिजेले बनाएको २ मिनेट ०१.८१ को विश्व कीर्तिमान भने उनले ०.१८ सेकेन्डले गुमाइन्। यो समय विश्व इतिहासमा दोस्रो छिटो हो।

‘हामी विश्व कीर्तिमान तोड्ने उद्देश्यसहित तयारी गरिरहेका थियौं,’ म्याकइन्टसले भनिन्, ‘आज अलिकति चुकिए पनि व्यक्तिगत रूपमा सर्वश्रेष्ठ समय आएकोमा खुसी छु। स्वर्ण जितेकोमा पनि गर्व लागेको छ। अब अझ मिहिनेत गरेर अगाडि बढ्नेछु।’

अमेरिकी रेगन स्मिथ दोस्रो भइन् (२ मिनेट०४.९९) भने अस्ट्रेलियाकी एलिजाबेथ डेकार्स तेस्रो भइन् (२ मिनेट०६.१२)। चीनकी १२ वर्षीया यू जिडी २ मिनेट ०६.४३ को समयमा चौथो स्थानमा रहिन्।

म्याकइन्टसले यसअघि ४०० मिटर फ्रिस्टाइल र २०० मिटर व्यक्तिगत मेड्ले पनि जितिसकेकी छिन्। अब उनी ८०० मिटर फ्रिस्टाइलमा अमेरिकी महान खेलाडी केटी लेडेकीसँग प्रतिस्पर्धा गर्दैछिन्। लेडेकी चार पटककी ओलम्पिक स्वर्ण विजेता र यो स्पर्धाको विश्व कीर्तिमान राख्ने खेलाडी हुन्। 

तर, म्याकइन्टसले गत महिना यो स्पर्धामा इतिहासकै तेस्रो छिटो समय निकालेकी थिइन्। यसैबीच, चीनकी १२ वर्षीया यू जिडीले प्रतियोगितामा उल्लेखनीय प्रभाव छाडेकी छन्। उनले आफ्नो सबभन्दा बलियो मानिएको स्पर्धा २०० मिटर व्यक्तिगत मेड्लेमा पनि चौथो स्थान हात पारिन्। 

उनले यदि त्यो इभेन्टमा कांस्य जितेकी भए सन् १९७३ बाट सुरु भएको विश्व च्याम्पियनसिपमा सबैभन्दा कान्छी पदक विजेता बन्ने थिइन्।