स्पालेटी युभेन्ट्सको नयाँ प्रशिक्षक

काठमाडौं। गत सात इगोर टुडोरलाई बर्खास्त गरी इटालीको चर्चित क्लब युभेन्ट्सले नयाँ प्रशिक्षक नियुक्त गरेको छ। लगातार आठ खेलमा जितविहीन रहँदा क्लबले टुडोरलाई हटाउने निर्णय गरेको थियो।

त्यसको एक सातापछि युभेन्ट्सले इटालीको राष्ट्रिय टोलीका पूर्व प्रशिक्षक लुसियानो स्पालेटीलाई नयाँ मुख्य प्रशिक्षकको जिम्मेवारी दिएको छ।

क्लबले एक विज्ञप्ति जारी गर्दै स्पालेटीसँग २०२६ को जुनसम्मको लागि सम्झौता भएको जनाएको छ। इटालियन सञ्चारमाध्यमहरूले जनाएअनुसार उनको प्रदर्शन सन्तोषजनक भएमा सम्झौता थप एक वर्षका लागि बढाउने विकल्प पनि रहनेछ।

६६ वर्षीय स्पालेत्तिले यसअघि नापोली, रोमा र इन्टर मिलानजस्ता क्लबहरूलाई प्रशिक्षण गराइसकेका छन्। उनले सन् २०२३ को अगस्टदेखि २०२५ को जुनसम्म इटालीको राष्ट्रिय टोलीको जिम्मेवारी सम्हालेका थिए।

मिलानमा आयोजित एक कार्यक्रममा स्पालेटीले भने,‘युभेन्ट्सजस्तो ठूलो क्लबको प्रशिक्षक बन्न पाउनु सबैका लागि ठूलो सम्मान हो। राष्ट्रिय टोलीपछि फेरि क्लब फुटबलमा फर्किन पाउनु मेरो लागि निकै रोमाञ्चक हुनेछ।’

सिरी ‘ए’ लिगमा लगातार ‘ड्र’ र हारका कारण युभेन्ट्स अहिले अंक तालिकाको मध्यभागमा रहेको छ। ९ खेलबाट १५ अंक बटुल्दै क्लब सातौं स्थानमा छ।

आउँदो शनिबार क्रेमोनीजविरुद्धको खेलमै स्पालेटीलाई युभेन्ट्सको डगआउटमा पहिलो पटक देख्न सकिनेछ।