राखेपले रोक्यो चैत्र १३ गते तय भएको एन्फा निर्वाचन

काठमाडौं। राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) को आगमी १३ चैत गते तय गरिएको साधारण सभा तथा निर्वाचन स्थगित गर्न निर्देशन दिएको छ।

राखेपको संघ–संस्था समन्वय शाखाका प्रमुख चन्द्रकुमार राईले सोमबार एन्फालाई पत्र पठाउँदै आफ्नो स्वीकृतिबिना साधारण सभा (अर्डिनरी कंग्रेस) तथा निर्वाचनसम्बन्धी सम्पूर्ण प्रक्रिया तत्काल स्थगित गर्न अनुरोध गरेका हुन्।

एन्फाले माघ २८ गते आगामी ४ वर्षे कार्यकालका लागि निर्वाचन गर्ने भन्दै तालिका सार्वजनिक गरेको थियो। तर, निर्वाचन आचारसहिंताले गर्दा निर्वाचन सरेको थियो। पछिल्लोपल्ट २२ फागुनमा नयाँ निर्वाचन तालिका प्रकाशन गर्दै १३ चैतमा निर्वाचन गर्ने अर्को सूचना जारी गरेको थियो।

तर, राखेपले राष्ट्रिय खेलकुद विकास नियमावली २०७९ को नियम ७ (ग) र राष्ट्रिय खेलकुद विकास ऐन २०७७ को दफा २८ (ङ) अनुसार परिषद्को स्वीकृति नभएसम्म एन्फाको साधारण सभा तथा निर्वाचनसम्बन्धी सम्पूर्ण काम कारबाही रोक्न निर्देशन दिएको हो।

‘परिषद्को स्वीकृती नभए सम्म संघको साधारण सभा (अर्डिनरी कग्रेस) तथा निर्वाचनसम्बन्धी सम्पूर्ण कार्य स्थगित गर्न राष्ट्रिय खेलकुद विकास ऐन, २०७७ को दफा २८ को (ङ) वमोजिम जानकारीका लागि अनुरोध छ,’ पत्रमा भनिएको छ।

राखेपले यसअघि नै एन्फालाई प्रचलित कानून बमोजिम साधारण सभा गर्न ११ बुँदे निर्देशनसहित पत्राचार गरेको थियो। तर, उक्त निर्देशनको अवज्ञा गर्दै एन्फाले निर्वाचन प्रक्रिया अघि बढाएको भन्दै उपाध्यक्ष विराटजंघ शाही र केन्द्रीय सदस्य रुपेश अधिकारीले उजुरी हालेका थिए।

यस्तो कार्यले अन्तर्राष्ट्रिय स्तरमा नेपालको प्रतिष्ठा तथा फुटबल खेलको विकासमा नकारात्मक असर पर्ने भन्दै गुनासो आएको राखेपले जनाएको छ।