थिम्पुलाई हराउँदै चर्च बोइज सेमिफाइनलमा

भद्रपुर। प्रतिस्पर्धात्मक प्रतियोगितामा चर्च बोइज युनाइटेडसामु स्तब्ध बन्दै भुटानको थिम्पु सिटी फुटबल क्लब चन्द्रगढी महिला गोल्डकपको पहिलो खेलबाटै घर फर्किएको छ।

दोस्रो दिनको खेलमा चर्च बोइज ३–२ गोल अन्तरले विजयी हुँदै सेमिफाइनलमा प्रवेश गरेको छ। खेलको २७औं मिनेटमा चर्च बोइजले अग्रता बनायो। भुटानकी गोलकिपर अगाडि बढेको अवस्थामा चर्च बोइजकी मरियम खातुनले दायाँ बार च्याप्दै डिबक्स बाहिरबाट गरेको प्रहारले जाली चुमेको थियो।

पहिलो हाफको अतिरिक्त समयमा खातुनले नै दोस्रो गोल थपिन्। वर्षा ओलीले मिलाइदिएको पासमा खातुनले प्रहार गरेको एक्रोब्याटिक प्रहारले भुटानका खेलाडीलाई टच हुँदै गोल भएको थियो।

पहिलो हाफ २–० को अग्रता बनाएको चर्चले दोस्रो हाफको ४४औं मिनेटमा पहिलो गोल खायो। भुटानकी रोता राईले चर्चकीको गोलकिपरलाई बिट गर्दै गरेको प्रहार गोलमा परिणत भएको थियो।

भुटानले अर्काे गोल उपहारमार्फत पायो। ५८औं मिनेटमा प्रिया घलेको क्रसलाई चर्चकी डिफेन्डर मनिता तामाङले क्लियर गर्न खोज्दा गोल भएको थियो। ७९औं मिनेटसम्म चर्चसँग २–२ को बराबरी खेलेको भुटानले खेलमा अन्तिम गोल डिफेन्डरको गल्तीमा खायो।

मैदानको मध्य भागमा पाएको बललाई वर्षा ओलीले गोलकिपरलाई बिट गर्दै गोल गरेकी थिइन्। उनकै गोलको मद्दतले चर्च बोइज सेमिफाइनलमा प्रवेश गर्न सफल भएको छ।

खेलको प्लेयर अफ द म्याच विजेता चर्च बोइजकी मरियम खातुन भइन्।