लगातार च्याम्पियन्स लिगको उपाधिबाट एक कदम पछाडि पीएसजी

काठमाडौं। पेरिस सेन्ट–जर्मेन (पीएसजी) का जर्जियाली स्टार ख्भिचा क्वारात्स्खेलियाले फेरि एकपटक उत्कृष्ट प्रदर्शन गर्दै टोलीलाई लगातार दोस्रो पटक युइएफए च्याम्पियन्स लिगको फाइनलमा पुर्‍याउन महत्त्वपूर्ण भूमिका खेलेका छन्।

बायर्न म्युनिखविरुद्ध बुधबार भएको दोस्रो लेगको खेल १–१ को बराबरीमा सकिएको थियो। तर, समग्रमा ६–५ को जित निकाल्दै पीएसजी फाइनलमा पुगेको हो। पहिलो लेगमा ५–४ को जितमा क्वारात्स्खेलियाले दुई गोल गरेका थिए। दोस्रो लेगमा उनले दिएको उत्कृष्ट असिस्टको सहयोग निर्णायक बन्यो।

‘हामी निकै खुशी छौं। आर्सनलविरुद्धको खेल कठिन हुनेछ भन्ने थाहा छ। म हरेक दिन मेहनत गरिरहेको छु र टोलीका लागि सक्दो योगदान दिनेछु,’ उनले भने।

खेलको तेस्रो मिनेटमै उनले सुरु गरेको आक्रमणबाट पीएसजीले अग्रता लिएको थियो। बायर्नको मध्यपंक्तिलाई छक्याउँदै उनले फाबियान रुइजलाई आकर्षक पास दिए। त्यसपछि रुइजको ‘वान टच’ पास सम्हाल्दै उनले बायाँ भागबाट तीव्र गतिमा अघि बढेर उस्मान डेम्बेलेलाई उत्कृष्ट क्रस दिए।

डेम्बेलेले शक्तिशाली प्रहारमार्फत बललाई जाली चुमाउँदै प्रतियोगितामा आफ्नो सातौं गोल गरे। यो सुरुआती गोलपछि बायर्न खेलमा फर्किन संघर्षरत देखियो। खेलको अन्तिम समयसम्म पनि क्वारात्स्खेलियाले अथक दौड र आक्रमण जारी राख्दै पीएसजीलाई थप अवसर सिर्जना गराइरहेका थिए।

पीएसजीका अध्यक्ष नासेर अल–खेलाइफीले टोलीको सामूहिक भावनाको प्रशंसा गर्दै भने,‘हामीसँग उत्कृष्ट र युवा टोली छ। सबै खेलाडी एकअर्काका लागि लडिरहेका छन्। अन्तिम मिनेटमा पनि क्वारा थाकिसकेका थिए, तर उनले संघर्ष छाडेनन्।’

गत सिजन डेम्बेले टोलीका मुख्य खेलाडी थिए भने यसपटक फाइनलमा क्वारात्स्खेलिया चम्किने अपेक्षा गरिएको छ। अब पीएसजीले ३० मेमा हुने फाइनलमा आर्सनलसँग प्रतिस्पर्धा गर्नेछ।

पीएसजीका प्रशिक्षक लुइस एनरिकेले टोलीको परिपक्व प्रदर्शनको प्रशंसा गरे। उनले भने, ‘आजको रात विशेष छ। खेलाडीहरूले कहिले रक्षा गर्ने र कहिले आक्रमण गर्ने भन्ने उत्कृष्ट समझ देखाए। प्रशिक्षकका रूपमा यस्तो प्रदर्शन हेर्न पाउँदा गर्व लाग्छ।’

घाइते खेलाडीहरूको अनुपस्थितिमा पनि लुइस एनरिकेले टोली संयोजनमा लचकता देखाएका छन्। फाबियान रुइजलाई मैदानमा उतार्ने निर्णय सफल रह्यो भने युवा खेलाडी वारेन जाइरे–एमेरीले दायाँ रक्षापंक्तिमा राम्रो प्रदर्शन गरे। उनले लुइस डियाजलाई प्रभावहीन बनाइराख्न महत्त्वपूर्ण भूमिका खेले।

क्वारात्स्खेलियाको आक्रमण र रक्षामा समान समर्पण अहिलेको पीएसजी टोलीको पहिचान बनेको छ। पहिले ठूला नामका खेलाडीमा निर्भर रहने टोली अहिले सामूहिक खेलमार्फत युरोपको सबैभन्दा ठूलो मञ्चमा सफलता नजिक पुगेको छ।

टोलीका रक्षक विलियन पाचोले भने,‘हाम्रो टोलीको मुख्य विशेषता भनेको मानसिकता हो। अग्रपंक्तिका खेलाडीहरूले रक्षामा मद्दत गर्छन् र हामी उनीहरूलाई आक्रमणमा सहयोग गर्छौं।’