ह्याण्डबलको बन्द प्रशिक्षण पोखरामा शुरु

पोखरा । नेपालमा आयोजना हुने १३ औं दक्षिण एशियाली खेलकुद (साग) अन्तरगत ह्याण्डबल खेलको बन्द प्रशिक्षण पोखरामा शुरु भएको छ ।

राष्ट्रिय खेलकुद परिषदका सदस्य राजेश गुरुङले प्रशिक्षकद्वय अरुणलाल कर्ण र टेकबहादुर विश्वकर्मालाई बल हस्तान्तरण गरि बन्द प्रशिक्षणको शुभारम्भ गरेका हुन् ।

सदस्य गुरुङले खेलाडीहरुलाई शुभकामना दिंदै राष्ट्रिय गौरब बढाउन ह्याण्डबल खेलले महत्वपूर्ण भूमिका निर्वाह गर्ने बताए ।
तोकिएकै मितीमा नेपालमा साग हुनेमा कुनै शंका नपाल्न सदस्य गुरुङले आग्रह गरे । उनले खेलाडी र प्रशिक्षकलाई भत्ता लगाएतका सुविधाहरु थप गर्न परिषदले गृहकार्य थालेको समेत जानकारी दिए ।

कार्यक्रममा नेपाल ह्याण्डबल संघका अध्यक्ष तेज गुरुङले खेलाडीलाई आफ्नो अनुशासनमा रहि पदक जितेर राष्ट्रिय गौरव बढाउन ह्याण्डबल खेलाडीलाई आग्रह गरे ।

सागको बन्द प्रशिक्षणका लागि २८ महिला र २८ पुरुष गरि ५६ जना खेलाडीहरु पहिलो चरणको छनोटमा परेका छन् । सागको महिला तथा पुरुषको ह्याण्डबल खेल पोखरा रंगशाला स्थित बहुउद्धेश्यिय कभर्डहलमा हुनेछ ।