'टिमवर्कले गर्दा च्याम्पियन भयौं'

काठमाडौं । नवप्रवेशी क्लब चर्च ब्वाइज युनाईटेडका मुख्य प्रशिक्षक बाल गोपाल महर्जनले टिमवर्कको कारण सहिद स्मारक 'ए' डिभिजन लिग फुटबलको उपाधि जित्न सफल भएको बताएका छन् ।

त्रिपुरेश्वरस्थित दशरथ रंगशालामा मंगलबार थ्री स्टार क्लबसँग गोलरहित बराबरी खेल्दै चर्च ब्वाइज च्याम्पियन बनेको हो ।

'एक खेल अगाबै च्याम्पियन हुन पाउँदा खुशी लागेको छ । टिमवर्कले गर्दा लिग जितेको हो,' च्याम्पियन बनेपछि महर्जनले भने,'अन्तिम खेल जितेर अपराजित रहदै उपाधि उचाल्नेछौँ ।'

महर्जनले साथ र सहयोगका लागि क्लबका अफिसियल र समर्थकलाई धन्यवाद दिए ।

कप्तान अनन्त तामाङले आफु उपाधिकै लागि चर्च ब्वाइजमा आबद्द भएको बताए ।

'उपाधि जित्दा खुसी लागेको छ । टिम हेर्दा उपाधि जित्ने क्षमता देखेर क्लबमा आबद्द भए । मेरो रोजाई सहि रहेछ भन्ने भएको छ,' अनन्तले भने ।

फरवार्ड अन्जन विष्टले लक्ष्य अनुसार सफल भएको बताए ।

'हाम्रो टार्गेट उपाधि थियो । त्यसमा सफल भएका छौँ । खुसी लागेको छ,' उनले भने ।