'कराँते खेलले हासिल गरेका उपलब्धि उदाहरणीय' 

काठमाडौं । नेपाल कराँते महासंघले आफ्नो बार्षिक साधारण सभा केही महत्वपुर्ण योजना सहित सर्वसम्मत रुपमा सम्पन्न गरेको छ । 

शुक्रवारदेखि मधेस प्रदेशस्थित निजगढमा भएको साधारण सभाको राष्ट्रिय खेलकुद परिषद्का सदस्य–सचिव टंकलाल घिसिङले शनिबार एक कार्यक्रमबीच उदघाटन गरेका थिए ।

साधारण सभामा मधेस प्रदेश सांसद माननीय मीना लामा, प्रदेश खेलकुद विकास परिषद्, बागमतीका सदस्य सचिव सूर्यलाल भण्डारीलगायतको उपस्थिती रहेको थियो । 

कार्यक्रमलाई सम्बोधन गर्दै सदस्य–सचिव घिसिङले निर्वाचन भएको एक वर्षको अवधिमा कराँते खेलले हासिल गरेको उपलब्धि खेल क्षेत्रका निम्ति उदाहरणीय भएको बताए ।

उनले एक वर्षअघि लामो समयदेखि विवादित रहेको कराँतेलाई एकिकृत बनाउन आफूले निर्वाह गरेको भूमिका खेलक्षेत्रको चलायमन रहेको खेल कराँतेप्रति न्याय गरेको बताउँदै जसको फलस्वरुप १९ औं एशियन गेम्समा कराँतेले रजत पदक हाशिल गरेको बताए । 

कार्यक्रमलाई सम्वोधन गर्दै मधेस प्रदेश सांसद मीना लामाले साधारणसभाको भव्य सफलताको शुभकामना ब्यक्त गरिन् । 

बागमती प्रदेश सदस्य सचिव सुर्यलाल भण्डारीले कराँते खेलसंग बिगत एक बर्षदेखि केही कार्यक्रम र प्रतियोगितामा साझेदारी गर्दै आईरहेको र आगामी दिनमा उक्त कार्यको निरन्तरता दिईरहने बताए । 

साधारणसभामा नेपाल कराँते महासंघका पदाधिकारी तथा सदस्यहरु, बिभिन्न ७ प्रदेशका प्रतिनिधि, पर्यबेक्षक लगायत करिव १ सय जना सहभागी भएको साधारण सभामा, नेपाल कराँते महासंघ कार्यसमितिले पेश गरेको बिधान संसोधन प्रस्तावलाई प्रथम साधारण सभावाट अनुमोदन गरेका थिए । 

महासचिव दावा गुरुङले २०७९ माघ १२ देखि २०८० साल चैत्र सम्मको प्रगति प्रतिवेदन प्रस्तुत गरेका थिए भने महासंघको आर्थिक बर्ष ०८०-०८१ को आय–ब्यय सहित बार्षिक कार्यक्रममा भएको आर्थिक बिवरणहरु कोषाध्यक्ष किशोर प्रसाद भट्टराईले प्रस्तुत गरेका थिए । 

महासंघका अध्यक्ष युवराज लामाले भावी योजना, तर्जुमा कार्यक्रम र रणनैतिक योजनाहरु सहित कराँते खेलले हाशिल गरेको उपलब्धिहरु सबैको योगदानले प्राप्त भएको बताए । सभालाई सम्बोधन मार्फत बिसर्जन गर्ने क्रममा अध्यक्ष लामाले मिशन सिक्स के सम्बन्धी प्रष्ट्याउदै सहभागी सबैलाई धन्यवाद व्यक्त गरे ।