८०० मिटर दौडमा त्रिभुवन विश्वविद्यालय प्रथम

काठमाडौं। विश्वविद्यालय खेलकुद प्रतियोगिताको दोस्रो दिन भएको महिला तथा पुरुषको ८०० मिटरको दौडमा त्रिभुवन विश्वविद्यालयका विद्यार्थीहरू प्रथम भएका छन्। 

त्रिभुवनका विकास घिमिरे र राज्यलक्ष्मी रावल प्रथम भएका छन्। विकासले निर्धारित दुरी २:१० मिनेटमा पार गरे भने राज्यलक्ष्मीले २:३५ मिनेटमा दूरी पार गरेका हुन्। यस्तै, मध्यपश्चिमाञ्चल विश्वविद्यालयका भरत राना र हिमाली शाही दोस्रो भए। भरतले २:१३ र शाहीले २:५८ मिनेटमा दूरी पार गरेका थिए। यस्तै, सुदूरपश्चिमाञ्चल विश्व विद्यालयका निपूर्ण चन्द  र गण्डकी विश्वविद्यालयकी कृति गिरी तृतीय भएका छन्।

यस्तै, महिला लङजम्पतर्फ त्रिभुवन विश्वविद्यालयकी सञ्चिता घिमिरे प्रथम, हिमाली साही मध्यपश्चिमाञ्चल विश्वविद्यालय द्वितीय र त्रिभुवनकी विना थापा तृतीय भएका छन्।

पुरुष २०० मिटर दौडमा सुदूरपश्चिम विश्वविद्यालयका मुकेश विष्ट प्रथम, त्रिभुवनका प्रकाश जोशी द्वितीय र काठमाडौं विश्वविद्यालयका विकासकुमार साह तृतीय भएका छन्। महिला २०० मिटरमा त्रिभुवनका विना थारु प्रथम र आकृति चौधरी द्वितीय भए भने लुम्बिनी विश्वविद्यालयकी मनिष कुँवर क्षेत्री तृतीय भइन्।