चितवनमा वुमन्स मोटर र्याली हुने 

काठमाडौं । बागमती प्रदेश अटोमोवाइल्स एसोसिएसनले चितवनको भरतपुरमा महिला मोटर र्याली आयोजना गर्ने भएको छ । चितवनको पर्यटकीय क्षेत्रलाई जोड्दै ड्राइभ टुरिजम, महिला सशक्तिकरण तथा साहसीक खेलकुदमा प्रवेश गर्ने उद्धेश्यले मोटर स्पोर्ट्सको प्रदेश संघले भरतपुर, मेघौली हुदै सौराहसम्म मोटर र्यालीको आयोजना गर्ने भएको हो । 

आईतबार पत्रकार सम्मेलनको आयोजना गरेर बागमती प्रदेश अटोमोवाइल्स संघका अध्यक्ष राजन पियाले भरतपुर, मेघौली, गोलाघाट, जगतपुर, पटिहानी, सौराह महिला मोटर ¥याली कार्यक्रम गर्न लागिएको जानकारी दिए । 

भरतपुरको नारायणी तिरस्थित चितवन उद्योग बाणिज्य संघबाट सुरु हुने र्याली ३० गाडीमा नेभिगेटर सहित ६० जना सहभागी गराईने आयोजकले जनाएको छ । नासा नेपालको स्पोर्ट्स लाइसेन्स लिएका नेपालभरीबाट इच्छुक महिला ड्राइभरले अनलाइन मार्फत नाम दर्ता गर्ने सक्नेछन् ।

प्रतियोगिताका विजेतालाई शिल्ड र प्रमाणपत्र प्रदान गरिनेछ भने उत्कृट २ जनालाई अन्तराष्ट्रिय खेलमा सहभागिताको अवसर प्रदान गरिने आयोजकले बताईएको छ । कार्यक्रममा ड्राइभर, नेभिगेटर, मार्शल, मेकानिक, मेडिकल र अन्य अपिसियल गरि सय जनाको सहभागीता रहनेछ ।

‘सहभागीले दर्ता शुल्क एक हजार तोकिएको छ । चितवन वाहिरवाट आउने सहभागीलाई १ रातको आवास व्यवस्था गरिनेछ । सहभागिको लागि खेलकुद विमा, रेसिङ्ग तथा रोड सेफ्टीको ओरीन्टेसन गर्नेछौं ।’ प्रदेश संघका अध्यक्ष पियाले भने । 

अध्यक्ष पियाका अनुसार कार्यक्रममा सबै किसिमका कार तथा जिपले भाग लिन पाउनेछन् । साथै  भरतपुर महानगरपालिकाका मेयरद्धारा शुभारम्भ गरिने प्रतियोगिताको समापन भने रत्ननगर नगरपालिकाका मेयरद्धारा हुनेछ । 

करिव ११ लाख ६० हजार बजेट लाग्ने कार्यक्रमलाई उद्यमी, व्यवसायी, दर्ता शुल्क मार्फत स्रोतको ब्यबस्थापन गरिने बताईएको छ । कार्यक्रमलाई भरतपुर महानगरपालिका, रत्ननगर नगरपालिका, चितवन अटोमोवाल्स डिलर एसोसिएशन, बागमती खेलकुद विकास परिषद, राष्ट्रिय खेलकुद परिषद, रेवान सौरहाले सघाउनेछन् ।